Li bajarê Hesekê yê Rêveberiya Xweser a Bakur û Rojhilatê Sûriyeyê bi hezaran kes bi daxwaza bidawîkirina tecrîda li ser Rêberê Gelê Kurd Abdullah Ocalan û pêkanîna “mafê hêviyê” meşiyan.

Bi dirûşma “Ji bo Rêber Apo azadiya fîzîkî” bi hezaran şêniyên bajarê Hesekê, endamên saziyan, gaziyên şer, malbatên şehîdan û koçberên Efrîn û Serêkaniyê ji bo azadiya fîzîkî ya Abdullah Ocalan daketin qadan. Meş ji Çerxerêya Sînalko destpê kir, heya Parka Rêber Apo ya li taxa Nasira ya bajêr dom kir. Di meşê de wêneyên Abdullah Ocalan hatin bilindkirin û dirûşmên “Bijî Serok Apo”, “Bê serok jiyan nabe” û “Bi can bi xwîn em bi te re ne ey serok” hatin berzkirin.

Piştî ku girseya meşê gihişt qadê, ji rêveberiya Kongra Star a bajarê Hesekê Beyan Xelîl axivî. Beyanê diyar kir ku daxwaza tevahî pêkhateyan azadiya fîzîkî ya Abdullah Ocalan e û wiha got: “Mafê Rêber Apo yê azadiya fizîkî heye. Divê mafê hêviyê pêk were û tecrîd rabe.”

Beyan Xelîl destnîşan kir ku ji bo pêkanîna banga aştiyê û pêkanînan diyalogiyê divê Abdullah Ocalan azad bibe.

Hevserokê Meclisa Bajarê Hesekê Faroq Tuzo jî wiha got: “Dewleta tirk a dagirker naxwaza diyalog û banga aştiyê bigihêje serî ji ber vê jÎ her tim astengiyan derdixe. Em jî di wê baweriyê de ku Rêber Abdullah Ocalan dê vê pêvajo bi ser bixe û her pêkaheteyek bigihêje. Hêviyên mezin em dijîn, ji ber ku Rêber Abdullah Ocalan di banga xwe de her carê hêviyê dide gelê xwe. Ji bo azadiya Rêber Apo em ê timî li qadan bin.”