Tevî tevgera dîplomatîk a xurt a li derve ya nûnerên Rêveberiya Xweser û Meclisa Sûriya Demokratîk (MSD), lê hîn jî bangên gelên Bakur û Rojhilatê Sûriyê yên ji bo girtina qada hewayî li pêşiya balafirên dewleta tirk a ku sûcan li herêmê pêk tîne, ji aliyê hêzên navneteweyî û rêxistinên wan ve nehatiye bersivandin.
Di vê derbarê de, serokê Meclisa Qebîleya El Cibûr, Fewaz El Zobei wiha got: “Me gelek caran bang li dewletên garantor û aliyên peywendîdar kirin ku balafirên dewleta tirk rawestînin, ji ber welatiyên me dike hedef, sûcan dike û aramî û ewlehiya herêmê têk dinbe. Banga me wekî gelên Bakur û Rojhilatê Sûriyê bi rêya Rêveberiya Xweser a ji hemû pêkhateyan ava bûyî, ew e ku mafê parastina herêmê ji dagirkeriyê rewa ye.”
El Zobei îşaret pêk kir ku girtina qada hewayî wê istiqrarê li herêmê pêk bîne, gel ji sûcn dewleta tirk biparêze û welat ber bi çareseriyeke siyasî ve bibe.
Di vê çarçoveyê de 33 partî û rêxistinên siyasî yên Bakur û Rojhilatê Sûriyê dest bi kampanyayekê kirine, her wiha 102 endamên Parlamentoya Fransayê tev li vê kampanyayê bûne û daxwaza ji parlamentoya welatê xwe kirine ku bikevin tevgerê da ku serokkomarê Franayê ji Meclisa Ewlekariyê bixwaze ku qada hewayî ya Bakur û Rojhilatê Sûriyê bigire, lê heta niha ev bang bê bersiv maya.
Ji aliyê xwe ve nûnerê Qebîleya El Begara ya Ereb di Meclisa Rûspiyan a Kantona Hesekê de û rûspiyê eşîra El bû Muslim, Ewad El Ugla bal kişand ser nepêkanîna bangên gelê Bakur û Rojhilatê Sûriyê ji aliyê hêzên navnteweyî ve bi berjewendî û armancên siyasî û aborî yên ku li ser têkiliyên van hêzan serdest in ve girê da û wiha domand: “Her dewletek xwedî daxwaz û armancên cuda ye, ji ber vê sedemê her tim bi hev re di nav nakokiyan de ne û her tim hewl didin wan berjewendî û destkeftên siyasî û aborî li ser hesabê gelan bidest bixin, ji bo wê jî bersivê nade banga gelên herêmê a girtina qada hewayî.”
Şêxê eşîra Elbû Muslim, Ewad El Ugla derbarê girîngiya vê bangê bû wiha got: “Girtina qada hewayî wê aramî û ewlehiyê li Bakur û Rojhilatê Sûriyê pêk bîne, wê serweriya xaka Sûriyê biparêze, her wiha wê rê li ber dagirkirina erdnîgariya Sûriyê bigire. Di heman demê de wê biryara Konseya Ewlekariyê ya Neteweyên Yekbûyî ya 2254’an derbarê Sûriyê de misoger bike.’ ‘
Hêjayî gotinê ye ku girtina qada hewayî li gorî madeya 7’an bi biryara Konseya Ewlekariyê ya Neteweyên Yekbûyî, bi erêkirina piraniya endaman tê pêkanîn.
çavkanî: ANHA
