Li navçeya Cizîr a Şirnexê bi sedan kes kom bûn û beşdarî merasîma sersaxiyê ya gerîlayê HPG’ê Dijwar Jêhat (Ferhat Erkûl) bûn. Ji bo Dijwar Jêhat ê ku di sala 2017’an de di şer de jiyana xwe ji dest da, li mala wî ya li Taxa Nûr a navçeya Cizîrê merasîma sersaxiyê hate lidarxistin. Endam û reveberên MEBYA-DER, DEM Partiyê, DBP, TJA û gelek kesên din beşdarî merasîmê bûn.
Parlamentera DEM Partiyê ya Şirnexê Nevroz Ûysal Aslan di sersaxiyê de axivî û bal kişand ser têkoşîna gelê Kurd a bi salan û got: ‘’Serê gelê me sax be. Em ji her kesên ku jiyana xwe ji dest didin, berpirsyar in. Gelê Kurd bi salan e li dijî zilmê li ber xwe dide. Di vê têkoşînê de gelê me bedêlên mezin dane. Tekane sedemeke van bedêlên mezin heye ku ew jî têkoşîna ji bo jiyaneke birûmet e. Daxwaza jiyaneke azad û wekhev e.’’
