Seke zanîyeno DEM Partî 28ê kanûna 2024î de şî Îmrali û Serekê PKKyî Abdullah Ocalanî reyde pêvînayîş kerd. Ocalanî pêşnîyazê xo sey 7 maddeyan rêz kerdî. Nê maddeyan de bi kilmî “îradeyê çareserîya persa kurdan” est o. Ocalanî bi taybetî bale ante girîngîya parlamentoyî ser û vat ke wa pêro dînamîkî û partîyî beşdarê nê prosesî bibê. Ocalan nêwazeno ke têna yew partî nê prosesî bidomno. Çike a partî eşkena nê prosesî seba plan û hesabanê xo sîyasîyan bixebitno. Coka ganî proses şeffaf bibo û pêro partîyî bêrê hayîdarkerdene. Maddeyan de çîyêko bîn muhîm o. Ocalan pêşnîyaz keno ke “wa pêro partîyê sîyasî mabênê xo de komîsyonêkî saz bikerê”. Serekê PKKyî rind zano ke persa kurdan persa ke mîyanê partîyan de yena nîqaşkerdene nîya, na perse serê partîyan de ya. Ganî na perse bi destê tayê partî û dînamîkan nêro hacetkerdene.
Pêşnîyazanê Ocalanî de merdim çimdarîye keno ke têna mîyanê Tirkîya û Kurdîstanî de nê, pêro herême de aştîye û azadîye yena talepkerdene. Rojawan ke mirozin bî, Bakûr keyfweş nêbeno. Her herêma Kurdîstanî girêdayîyê yewbînî ya. Dima ra pêşnîyazê Ocalanî mîyanê partîyan de ameyî nîqaşkerdene. Heyetê DEM Partî partîyê bînî zîyaret kerdî û fikrê înan zî girewtî. Pêvînayîşan de zafêrîya partîyan seba çareserî îradeyêko pozîtîf ramojna. Tewr zîyade AKP û MHPyî vera pêşnîyazanê Ocalanî reftarêko nerm mojna. Gama ke merdim ewneno, fikrîyeno ke îqtîdar seba pêvînayîşan amade yo û wazeno ke tayê gaman bierzo. La raştîye de nê gamî şik afernenê.
Gefê hukmatê tirkan
28ê kanûne ra nata 2 hewteyî ravîyartî, dewleta tirke polîtîkaya xo ya qirkere û nîjadpereste ra fek vera nêda. Her roje îdarekarê hukmatî vera Rojawanî gefanê gemarinan wanenê. Wezîrê Karanê Teberî Hakan Fîdan vano ke “ê do hêrişê Rojawanî bikerê”. Reyna zî Serekkomar Erdogan vano ke “ma do şewe xafil de bêrê”. Na çarçewa de her roje cergê SMOyî bi hetkarîya hukmatê tirkan hêrişê vera awbendê Tişrînî û pirdê Qereqozaqî kenê. Çend rojan verî şarê Rojawanî seba ke nê hêrişanê lêşinan protesto bikero, şî awbendê Tişrînî. SÎHAyanê tirkan hêrişê şarî kerd û şar dîya bombayan ver. Qetlîyam de 5 merdimî ameyî qetilkerdene ve 15 merdimî zî dirbetin bîyî. Êdî ame eşkera kerdene ke hukmatê Erdoganî wazeno Rojawanî îşxal bikero. Hetêk ra qaso ke kurdan reyde pêvînayîşan keno, hetekê bînî ra planê îmhayî ano ca. Tîya de dirîyîye est a. Gelo çira hende nê awbendî hedef gênê? Çike nê heramîyî baş zanê ke awe û elektrîkê xeylêk şaristanan nê awbendî ra yenê peydakerdene. Heramîyî wazenê ke şar bê awe û elektrîk bimano û cayê xo ra biremo. Nê planê xeznagî duştê ruhê pêvînayîşan ê. Nê planî têna prosesî xeripnenê.
Mewlewî û bektaşî
Îdarekarê dewlete rojêke “mewlewî” benê, rojêka bîne nêzdîbîyayîşê xo bedilnenê û “bektaşî” benê. Siba vanê ke “ma aştîye wazenê”, şan rojnamegeranê kurdan qir kenê. Nazim Daştan û Cîhan Bîlgîn hetê îqtîdarê AKPyî ra ameyî qetilkerdene. Keyeyanê wirdî rojnamegeran waşt cenazeyanê domananê xo teslîm bigêrê, la nêdîyayî ci. Tîya de zî dişmenîyêka pîle qewimîyaye. Hêrişê vera çapemenîya azade nîjadperestîya nê îqtîdarî eşkera kenê.
