Pisporê huqûqê mîyanneteweyî Prof. Norman Paechî dîyar kerd ke NATO Û Ewropa dirîyîye kenê û wina vat: “Ganî NATO nê hêrişan bigêro rojdemê xo û vera rejîmê Erdoganî vejîyo.”
Pisporê huqûqê mîyanneteweyî Prof. Norman Paechî derheqê hêrişanê îşxalî yê dewleta tirke yê vera Rojawanê Kurdistanî de ANFyî rê qisey kerd.
Prof. Paechî ard ziwan ke endama Peymana Atlantîkî ya Vakurî (NATO) Tirkîya serranê peyênan de heqanê merdiman û krîteranê huqûqê mîyanneteweyî binpay kena û vat: “Heyf ke hêrişê bêrehmî yê şarê kurdî seke normal ê yenê dîyene. Tirkîya bi hêrişê Rojawanî bendê 4 û 7î yê madeya 2. ya Neteweyanê Yewbîyayeyan (NY) binpay kena. Coka ganî Tirkîya Mehkemeya Ceza ya Mîyanneteweyî de bêra muhakemekerdene. NY û NATO seba qedînayîşê hêrişanê Tirkîya ganî cade têbigêrê.”
Prof. Paechî vist vîrî ke kurdan Rojawan de sîstemêko demokratîk û têduşt awan kerdo û ganî no sîstem hetê hêzanê mîyanneteweyîyan ra bêro pawitene. Prof. Paechî vat: “Kurdan dinya cerganê DAÎŞî ra xelisnabî. La Amerîka û Rûsya nê hêrişan de kurdî teyna verdayî. Nê hêrişî dirîtîya NATO û Ewropa zî eşkera kenê. Eke Almanya biwaza eşkena cade verê nê hêrişan bigêra û Tirkîya rê ambargo bikera. La herinda ney de Almanya hemkarîya Erdogan û sucanê ey kena.”
Prof. Paechî nêzdîbîyayîşê Almanya yê bi hêrişanê Tirkîya rexne kerd û vat: “Qiseyê Wezîra Karanê Teberî Nancy Faesere ‘Ganî hêrişî heta astêke bibê’ zaf tesîrê mi kerd. No qisey nêno qebulkerdene. Almanya ganî bi zelalî vaja ‘Nê hêrişî goreyê huqûqê mîyanneteweyî û endamîya NATOyî nîyê’ û tewirê xo bimojna. Ganî NATO nê hêrişan bigêro rojdemê xo û vera rejîmê Erdoganî vejîyo.”
