Serekê Rûmetî yê ÎHDyî Akin Bîrdalî ard ziwan ke ganî her kes seba çareserîya meseleya kurdan bibo vengê tepişteyanê grevê vêşanîye.

Şubeyê Mersînî yê Komeleya Heqanê Merdiman (ÎHD) çarçewa Hewteyê Heqanê Merdiman de Şaredarîya Yenîşehîrî de panelê “Vizêrî ra Heta Ewro Zîndanan û Qirkerdişê Zîndanan ê 19ê Kanûne” kerd. Serekê Rûmetî yê ÎHDyî Akin Bîrdal, Hemvervatoxa Komîsyonê Zîndanan a ÎHDyî Nuray Çevîrmen Aykole, Sekretera Şubeyê ÎHDyî ya Mersînî û şahîdê Qirkerdişê 19ê Kanûne Bekîr Sitki Keçecîyî panel de qisey kerd.

Sitki Keçecîyî ard ziwan ke Qirkerdişê 19ê Kanûne qirkerdişanê tewr pîlan ra yew û sûcê vera merdimatîye yo. Keçecîyî vat: “Nê qirkerdişî de 8 hezar û 500 cendirmeyan û hezar û 500 polîsanê sivîlan hêrişê ma kerd. Merdimî ameyî vêşnayene.”

Serekê Rûmetî yê ÎHDyî Akin Bîrdalî bale ante hukmatê AKPyî ser û vat: “Tirkîya vurîyaya welatê zîndanî. Ewro tepişteyî vera tecrîdî grevê vêşanîye de yê. Seba çareserîya meseleya kurdan û wedarîyayîşê tecrîdî ganî ma bibê vengê tepişteyanê grevê vêşanîye.”