Hemserekê Pêroyî yê ÎHDyî Ozturk Turkdoganî Qetilkerdişê Parîsî yê 23ê Kanûne ercna û wina vat: “Ganî wezîfedarê Fransa nê qirkerdişî her hetî ra cibigêrê û raştîyan eşkera bikerê. Bi nê hawayî kurdî û şarê bînî yê Fransa zî do bipawîyê.”
Hemserekê Pêroyî yê Komeleya Heqanê Merdiman (ÎHD) Ozturk Turkdoganî derheqê serebûtanê peyê Qirkerdişê Parîsî yê 23ê Kanûne de ANFyî rê qisey kerd.
Turkdoganî ard ziwan ke hêrişê winayênî tim binê armancêkê cîyayî de nimîyenê û vist vîrî ke nê hêrişî de zî bi giranî îdîaya hêrişê nijadperestî yena kerdene. Turkdoganî dîyar kerd ke hêrişker 12ê kanûne de bi şertê kontrolê edlîyî de bî la nêame kontrolkerdene, hêrişê Merkezê Kulturê Kurdan ê Ahmet Kayayî kerd coka hêriş bi bahaneyanê normalan nêno pênasekerdene.
Turkdoganî da zanayene ke wexto ke metodê hêrişanê winayênan bêrê ercnayene eşkera beno ke ganî peyê perdeyê nê hêrişî qetî bêro cigêrayene û vat: “Hêrişker hetê kamî ra ame erşawitene, kamî agahî dayo, senî çeke peyda kerda, kam kerdo hedef? Ganî nê çîyî bêrê perskerdene û cigêrayene. Serebûtê qetilkerdişê Sakîne Cansiz, Leyla Şaylemez, Fîdan Dogane zî nêame cigêrayene coka qirkerdiş dibare bî. Eke qetilkerdişê Sakîne Cansize biameyêne roşnîkerdene no qirkerdiş nêqewimîyayêne. Ez pê bawer a ke sîyasetmedarê Fransa narey hîna bi baldarî nêzdîyê mesele bibê. Ganî wezîfedarê Fransa nê qirkerdişî her hetî ra cibigêrê û raştîyan eşkera bikerê. Bi nê hawayî kurdî û şarê bînî yê Fransa zî do bipawîyê.”
Turkdoganî da zanayene ke Tirkîya de weçînayîşî benê nêzdî, îqtîdar verê xo dano meseleya kurdan ke provakasyonan bikero û vat: “Weçînayîşî ra verî dewaya vera HDPyî û operasyonê DBPyî yenê kerdene. Prosesê weçînayîşî seba Tirkîya do asta tarîxî de girîng bibo. Îqtîdar xîret keno ke tedaya sîyasetê kurdan bikero. Ganî nê prosesî de her kes bi baldarî têbigêro.”
