Tarîxnas û teorîsyen George Katsiaficasî dîyar kerd ke Serekkomarê Tirkîya Recep Tayyîp Erdogan wazeno pêro waranê ke tede kurdê azadî ciwîyenê çin bikero u vat: “Ganî mehkemeya ceza ya mîyanneteweyîye de bêro tepiştene.”
Tarîxnas û teorîsyenê yunanî George Katsiaficasî derheqê hêrişanê kîmyewîyan ê Erdoganî de ANFyî rê qisey kerd û da zanayene ke ganî Erdogan mehkemeyêka mîyanneteweyîye de bêra muhakemekerdene.
George Katsiaficasî rexne kerd ke Tirkîya pê çekanê kîmyewîyan hêrişê kurdan kena û wexto ke Lahey de dewa ameye akerdene Erdogan do hînî bi rehetî têmegêro. George Katsiaficasî vist vîrî ke Rêxistina Qedexekerdişê Çekanê Kîmyewîyan (OPCW) zî rixmê hende delîlan vera hêrişanê kîmyewîyan ê Tirkîya qebul nêkeno.
Katsiaficasî vat: “Medyaya mîyanneteweyîye bi hîsgêrî nêzdîyê şerê Rûsya yê vera Ukrayna bena la babeta kurdan de xo kena kor û lal. Ganî warê mîyanneteweyîyî de seba kurdan kampanyayêke bêra kerdene. Qirkerdişê Helebçe 1988î de ame kerdene la komelê mîyanneteweyîyî 2006î de ancax vera ney nêrazîbîyayîşê xo mojna. Kurdê ke zanenê paştî nêdîyena înan, hînî pê hêzêkê teberî bawer nêkenê. Ganî verê OPCWyî de çalakîyê ke kurdî kenê, do dewam bikerê. Ganî komê mîyanneteweyî paştî bidê nê çalakîyan.”
George Katsiaficasî bale ante gefanê Erdoganî yê vera Rojawanê Kurdistanî ser û îfade kerd: ”Erdogan wazeno pêro waranê ke tede kurdê azadî ciwîyenê çin bikero. Erdogan ganî sûcanê xo yê şerî ra mehkemeya ceza ya mîyanneteweyîye de bêro muhakemekerdene û tepiştene.”
George Katsiaficasî tewr peynî de vat: “Ma do pîya ser bikewê.”
