Rayberê Şarê Kurdî Abdullah Ocalanî bi verpersîyarîyêka tarîxî di 27ê menga sibate de bi vengê “Aştî û Civaka Demokratîke” gamêka tarîxî eşte. Di na gama tarîxî de qabê kurdî û Kurdîstanî, qabê Tirkîya û heme Rohjelatê Mîyanênî bedelnayê zaf pîl û muhîmî est ê.
Rayber Apo bi na gama tarîxî wazeno yewîtîya demokratîk a şaran û yewîtîya Kurdîstanî ya demokratîke awan bikero. Yewîtîya Kurdîstanî û yewîtîya şaran a demokratîke de menfîetê heme şaran û heme dewletanê Rojhelatê Mîyanênî est ê. Yewîtîya demokratîke biratîya raştîne qedîm kena, heme pirsgirêkanê esteyan çinê kena û şer qedênêna. Demokrasî, aştîye, azadîye xurt û mayinde bena.
Nê bedelnayîşan ra herî muhîm yew ke fesîhkerdişê PKK û qabê verdewamê xoverdayîş û azadîya kurdan destpêkerdişê merhaleyêkê neweyî be. Rayberê PKK’yî di eşkereyanê xo de ro nê vengê Rayberê Şarê Kurdî wayîr vecîyayî û vat çi biko ser milê ma ma hedreyê bikerê.
PKK di 12yê gulana 2025î de eşkera kerd ke înan Kongreya xo ya 12. pêk arda û qabê destpêkerdişê merhaleyêkê neweyî xo fesîh kerdo. Yanî PKK û xoverdayîşê PKK’yî nêqedyeno û çinê nêbeno. Do bi ray û raybazanê neweyan verdewam bikero.
Pergalêko newî
Nizdiyê 50 serrî yo kurdî di pêşengîya PKK’yî de xover danê. Nê xoverdayîşî di miyanê civaka kurde de zaf bedelnayîşê muhîm û tarîxî viraştî. Di warê xo rêxistinkerdiş û xo pawitiş de kulturêko xurt awan kerd. Averşîyayîş û destkeweteyê zaf muhîmî û pîlî vetî orte. Nika zî PKK bi nê qerarê xo wazeno destkewteyanê xo yê 50 serre bipawo û bi pergalêko newî xoverdayîşê xo xurt bikero. Qabê awankerdişê pergalêkê newî ke wazeno sere ra heta binî xo bibedelno.
Gama tarîxî
Wexto ke PKK de no bedelnayîş bivirazîyo, hewceyo ke dewlete de zaf bedelnayîşê muhîmî bivirazîyê. Nika çimê herkesî ser dewlete de yê û herkes meraq keno, gelo rayedarê dewlete çiqas di ferqê muhîmîya na gama tarîxî de yê. Do çiqas sozê xo biyarê ca û di pratîk de pêk biyarê.
Heta nika dewlete tenê yê tirkan bîye, do na dewlete bibo yê kurdan zî ya nê. Bi kilmî na dewlete de do kurdî bibê ya nê. Yanî hewceyo di sere de hişmendîya çinêhesibnayîş û çinêkerdişê kurdan bibedelîyo. Heke na hişmendîye bibedelîyo, bêguman do çar parçeyanê Kurdistanî de bandore bikero. Do dewleta tirke nêeşko PKK xo rê bikero hêcet û hêrişanê xo yê dagirkerîyan pêk bîyaro.
Wezîfeyê dewleta tirke
Herî zêde do bandor ro Rojawanî bikero. Çimkî Rojawan de pergalo ke awan bîyo, felsefe û paradîgmaya Rayber Apoyî esas geno. Loma dewleta tirke wazena destkewteyanê şaranê Rojawanî û felsefe û paradîgmaya Rayber Apoyî tasfîye bikero. Bi destê çeteyanê xo şerêko bêexlaq û bêsînor ramit. Qabê nê şerê xo estbîyayîşê PKK’yî xo rê kerd hêcet. Nika PKK nêmend û hêcetê dijminî kurdan û hêrişanê ser Rojawanî zî nêmend. Heke dewleta tirke wazena kurdan dir werê bêro û biratîya kurd û tirkan qayim bikero, hewceyo ke kurdanê teberê Tirkîya dir zî dijminî nêkero. Kurdî heme yew ê, kurdanê Tirkîya dir dost, kurdanê teberê Tirkîya dir dijminî nêbena. Aqil, wijdan û exlaq qebûl nêkeno.
Heke dewlete fina her reyî soz û bextê xo ser nêvindero, hişmendîya xo ya çinêhesibnayîş û çinêkerdişê kurdan nêbedelno, gamanê pêwîstan nêerzo û pergalê xo nêbedelno, tecrîdê ser Rayber Apoyî û hêrişê ser Rojawan û Başûrî verdewam bikero, mixabin do pêvajoyê şerî raynê apey bêro. Çimkî wexto ke hêriş bibo do xo pawitiş zî bibo.
Hewcoyo civak bi heme sazî û dezgeyanê xo yê sivîlan û partiyanê xo yê siyasîyan bi şew û bi roc ma qabê serkewtişê na merhaleya bedelnayişî wayir biveciyim, muhîmîya nê merhaleyî bi desthilatdarî û heme raya pêroyin bidim famkerdiş û destûr nêdim desthilatdarî raynê ro şaran bêbextî bikero.
