Mîyanê yew serre de Kurdîstan, Tirkîya û Rojhelatê Mîyanênî de xeylêk çîyî bedilîyayî. Rewşa Sûrîye Tirkîya ser o zî tesîr viraşt û hukmatê Erdoganî planê xo bedilna. Na çarçewa de Rayberê Şarê Kurdî Abdullah Ocalanî reyde pêvînayîşan dest pêkerd. Dewlete fam kerd ke şaro kurd Rojhelatê Mîyanênî de dînamîko dîyarker û tesîrdar o. Polîtîkaya şerî ra fek vera da, dest pê polîtîkaya “detente” kerd. Bêguman peyê na polîtîka de vera hîrabîyayîşê Îsraîlî armancê hêzdarbîyayîşî zî est o. Êdî eşkera bî ke mîyanê Tirkîya û Îsraîlî de Rojhelatê Mîyanênî de şerê hegemonya est o. Tirkîya nêwazena ke Îsraîl kurdan reyde îtîfaq bikero û serdestîya xo bizedno.
Rayber Abdullah Ocalan sey muzakerevano serekeyî tewrê pêvînayîşan bî. Xora ey hertim çareserîya demokratîke pawitêne. Yanî waştêne ke persa kurdan û demokratîkbîyayîş bi rayîrê dîyalogî bêrê çareserkerdene. Nê konteksî de mesuldarîyêka pîle girewte xo ser û 27ê sibate de veng da PKK’yî. Na roje ra pey prosesê Aştîye û Komelê Demokratîkî dest pêkerd. PKK’yî peştî daye vengdayîşê Rayber Ocalanî û 1ê adare de adirbest îlan kerd. Çend mengan ra dima 5-7ê gulane de Kongreya xo ya 12. kerde û xo fesh kerd. Na kongre ra dima PKK’yî gamêka tarîxî ya bîne eşte, 11ê temmuze de gerîlayan çekê xo vêşnayî. Yew armanc est bî, o zî prosesê Aştîye û Komelê Demokratîkî rê hetkarî kerdiş bî.
Awankerdişê cuya hempare
Vera gamanê PKK’yî dewleta tirke binê serbanê parlamentoyî de “Komîsyonê Paştîdayîşê Neteweyî, Wayûbirayîye û Demokrasî” awan kerd. Estîya komîsyonî muhîm a, la karê xo qîm nêkeno. Heta nika 16 kombîyayîşî virazîyayî, hewce nêkerdêne ke hende kombîyayîşî bibê. Ganî komîsyonî zaf lez pêşnîyazê qanûnî bikerdêne. Çiqas ke komîsyon karê xo xejilneno, hende bawerîya komelî fînena. Serekê Komîsyonî Numan Kurtulmuşî vatêne ke wa PKK gamanê şênberanê bînan bierzo, ê derbasê serûberkerdişanê qanûnîyan bibê. Netîce de Têgêrayîşê Azadî yê Kurdîstanî 26ê teşrîna verêne de gamêka tarîxî ya bîne eşte û eşkera kerd ke tayê komê gerîlayan Bakûrê Kurdîstanî ra anjîyayî. Na eşkerayîye de ma çimdarîye kenê ke reyna îradeyê çareserîye est o. Têgêrayîşê Azadî yê Kurdîstanî wazeno ke persê seserre êdî bêrê çareserkerdene, cuya hempare, azade û têduşte bêro awankerdene. Ganî komîsyon yan dewlete nê îradeyî bivîno û gamanê şênberan bierzo. Xora eşkerayîye de ame vatene ke wa qanûnê azadîye û entegrasyonê demokratîkî bêrê viraştene. Yanî seba PKK’yî huqûqo demdemî hewce keno. Yewna zî qanûnê sey Qanûnê Têkoşînê Vera Terorî, Qanûnê Muhakemekerdişê Ceza ganî wedarîyê yan zî bibedilîyê.
Wezîfeyê dewlete
Heta nika dewleta tirke çekî û estîya gerîlayan sey bahane şuxilnayêne û game nêeştêne. Êdî vere dewlete de çi “astengîye” zî nêmende. Wa hukmatê Erdoganî êdî kesî nêxapino û wezîfeyê xo bîyaro ca. Komel verî hemwelatîya têduşte wazeno. Yanî heme şar û bawerîyî wazenê ke warê pêroyî de bêrê temsîlkerdene. Na çarçewa de demokrasîyo rasterast hewce keno. Êdî demokrasîyo temsîlkar probleman çareser nêkeno. Ganî heme pergalo sîyasî newe ra bêro awankerdene. Ganî qanûno bingeyî yo newî bêro viraştene, huqûq xoser bibo û hukm serdest bibo.
