Bajarê Frankfurtî yê Almanya de Festîvala Kulturê Dêrsimî ya 13. do 26-27ê gulane de bêro kerdene.

Roja verêne de panelo bi babete “Wa dewleta tirke qirkerdişan reyde bêra têrî! Bedilnayîşê Demografîkî Vindarne” bêro kerdene. Panelo ke moderatorîya ci do Sevda Guneye bikero Endama Komîteya Jîneolojî Haskar Kirmizigule, Nuştox Turabî Saltik û Cigêrayox Îmam Canpolat do sey qiseykerdoxan tewrê ci bibê. Saetanê şanî de zî bi tewrbîyayîşê Didar Ana û Pir Huseyin Yagmurî do cem bêro ronayene.

Roja diyin a festîvale zî do bi panelî dest pêbikero. Panelo ke moderatorîya ci do Hulya Şimşeke bikero de Cigêrayoxe Nezahat Gundogdu, Têgêrayîşê Cinîyan ê Kurdan ra Besime Konca û Perwerdekare Inci Kaya do sey qiseykerdoxan tewr bibê. Saete 13.00 de programê sehne do bi gulbangî dest pêbikero. Parlamenterê Partîya Çep a Keske, îdarekarê komeleyanê elewîyan ê Ewropa û Şaredarê Frankfurtî sey qiseykerdoxan sehne de cayê xo bîgêrê. Hunermendî Ayfer Duzdaşe, Ferhat Tunç, Huriye Ahuzare, Grup Munzur, Ozan Rencber, Leyla Soysurene, Hasan Saglam, Ozan Serdar, Umuda Haykiriş û Arêyê Kayî zî bi deyîranê xo reng bidê festîvale. Reyna do pêramotişê resîman zî festîvale de cayê xo bîgêro û xeylêk nuştoxî xeyman de wendoxanê xo reyde bêrê têhet. Rîyê erdlerzî ra do emser festîvale de veyveyê Dêrsimî mero kerdene. Qezencê festîvale do mexdûranê erdlerzî rê bêro şawitene. Semedê domanan zî do cayo taybet bêro amedekerdene.

Hemserekê FEDA Demîr Çelîkê ke derheqê festîvale de ajansê ma rê qisey kerd, veng da heme dêrsimijan û dostanê înan ke wa tewrê festîvale bibê. Demîrî wina vat: “Seba ke ma ameyîşê înanê ke dûrî ra yenê rehet bikerê, wesayîtê taybet û komresî amade kerdî. Kam wazeno, bêro wa xo biresno komele û dergahanê ma. Seke yeno zanayene, kurdî û elewîyî komelê teberê dewlete û îqtîdarî yê. Ziwan, kultur û bawerîya ci ameyî înkarkerdene û raştê qirkerdişan ameyî. Semedê hesabpersayîşî ganî ma têkoşînê rêxistinkerdişî rayra berê û paştîdayîşî xurtêr bikerê. Dewlete û îqtîdar waştişanê ma yê bingeyînan înkar kenê û dej û zilmanê neweyan kenê. Dewlete ganî qirkerdişanê xo reyde bêro têrî. Ma Festîvala Dêrsimî de bêrê têhet û wayîrê heqanê xo bivejîyê. Ma waştişanê xo reyna bi vengê berzî bîyarê ziwan.”