Heta enka dinya de çende hebî fotografî hameyî antiş? Jo, des, se, hezar, se hezar, mîlyonêke, mîlyarêke? Çende hebî? Helbet yew nêzano çende hebî hameyî antiş. Belkî muhîm nîyo zî. Hema zî yenê antiş û go her daîm bêrê antişî zî.
Her fotografêk çîke mocneno ra, la henî fotografî estê bawer bikerê merdim wexto hawneno tera, merdim eşkeno hîkayeyan, romanan tera binisno.
Dinya de têvereştişê fotografan zî estê. Ya zehf bi name û venge Têvereştişê Fotografan ê Pulitzer a.
Zanîngehê Columbia, bajarê New Yorkî de hetê rojnamegerî, wêje û muzîkî de xelate dana fotografanê serkewteyan. Di se serrey 19’inan de hetê rojnamegerêke mûsevî yê bi eslê xo macar Joseph Pulitzer ra hamiya viraştiş. Xelata joyîne di 4’ê hezîrana 1917’inan de hamiya dayişî û hema zî a xelate her serre yena vilakerdiş. La enka her serey aşma nîsane de xelate danê. 21 kategorîyan de xelatan danê û fotografo bi ser biko bi 10 hezar dolarî û sertîfîkayke xelat kenê. Xelatî zî hetê lijneyke xoser ra yenê weçînayişî.
Mîyanê kurdan de Têvereştişê Mûsa Anter û Şehîdê Çapemenî estî. Mîyanê ene têvereştişî de xelatey fotografî zî esta ke semedê ene joy ewro ma ene mesela girote dest.
Emsar di fotoyan xelat girewt û hebêke zî jurî xelata taybete da ci. Meselay ma yînan ra yew a; Fotografê Zeynep Kuraye…
Ma qal bikerê: Çende hebî mebûsê HDP’yî, erê erê mebûsî, nê, endamê endamê HDP’yî nê, nê zî merdimê bînî, mebûsê HDP’yî Stenbol de; erê erê Stenbol de, Amed û Wan de zî nê, Stenbol de vecîyayê Kolanê Îstîklalî û vilawekan kenê vila. La no çi yo? Polîsan dormeyê hîrê-çar mebûsan girewto û nêverdenê vilawekan bikerê vila… Zeynep Kuraye zî fotoyê înan anta û bi enî fotoy xelate girewta.
Mebûsî, vilaweke… Tiya de sûc çi yo? A rast sûc çinî yo. Mebûsî ke endamê Meclisê Pîle yê Tirkîye û vilawekan ke heqê înan o kenê vila.
A rast fotograf vano “Heme çî eşkero yo, çîkew bîn ez vacî çinî yo”…
Ez Zeynep Kuray pîroz kena. Bêrê, bê kem a xeberî bidê, bê veng cayke ra bêro ma çende deqey bawnê enî fotografî ra û ma bifikiriyê…
