Stenbol de bi destê KAYY-DERî Festîvala Boreka Kurdan ameye serûber kerdene.
Parlamenterê Partîya Çep a Keske Cengîz Çîçek, Omer Ocalan û Omer Faruk Hulaku zî tede xeylêk kesî tewrê festîvale bîyî. Bi taybetî doman û cinîyan eleqeyêko pîl mojna festîvale ra.
Festîvale bi deyîran dest pêkerd, dima zî beşdaran rê boreka kurdan ameye vilakerdene.
Hemsereka KAYY-DERî Bîlsen Ozdogane festîvale de qisey kerd û vat: “Ma kenê ke vera asîmîlasyonî kulturê xo bipawê. KAYY-DER bi têkoşînê xo keno ke paştdayîşê şarî bizêdîno. Ma heta peynî hetê aştîye de yê. Ma xoverdayîşê cografyaya Kurdistanî teqîb kenê. Ma est ê û do est bê.”
Festîvale de hunermendî Alîcan Bîlgin, Mervan Tan, Cahît Şer, Ufuk Yilmaz û Koma Cinîyan a KAYY-DERî vejîyayî sehne ser. Festivale de Teatra Evîn Welat zî vejîyaye sehne ser.
Festîvale pê govendan qedîyaye.
