Festîvala Filmên Kurdî ya Stenbolê ya di 24’ê adarê de destpêkirî doh bi dawî bû. Merasima bidawîkirina festîvalê li Navenda Çanda Cemil Candaş a Şîşliya Stenbolê li dar ket. Sakîna Jîr û Taylan Kesanbilici bi kurdî û tirkî pêşkêşvaniya festîvalê kirin. Ji Kolektîfa Sînemayê ya Mezopotamyayê Adar Taş û Hebûn Polat jî li ser navê komîteyê axivîn û spasiya beşdaran kirin.
Piştî axaftinan bi filmên derhêner Nader Saeivar ê bi navê “Namo” festîval bi dawî bû. Derhêner Saeivar piştî film bersiva pirsên temaşvanan da û qala çîroka çêkirina film a ligel Cafer Penahî kir.
Festîvala Fîlmên Kurdî ya Stenbolê roja 24’ê adarê bi merasima destpêkirinê deriyên xwe vekiribû. Ji wê rojê heta dawî 28 fîlmên metrajdirêj, kurtefîlm û belgefîlm nîşan dan. Her wiha forumeke bi navê “Forûma Sînemaya Kurdî” li dar xistin.
