FEDA venga her kesî da ke wayîrê Cemxaneyê Duzgun Babayî vejîyo ke hetê Qeymeqamê Qisle ra amebi tehdîtkerdene.
Qezaya Qisle ya Dêrsimî de Serekê Cemxaneyê Duzgun Babayî Sînan Kirmiziçîçekî perey bi eşkerayîya nuştekîye dabi eşnawitene ke hîrê serranê peyênan de Cemxaneyê înan rê bîllasebeb 60 hezar cezaya pereyî ameya birnayene û nê sey bêhuqûqîye name kerdbi. Bado ke çapemenîye de xebere vila bîye Qaymeqamê Qisle Ugur Tutkan pîya bi hêzanê leşkerî şi Cemxane, fotografê ke destê înan de tifingî estê medyaya sanale de pare kerd û Kirmiziçîçek tehdît kerd.
Tutkanî îdîaka kerd ke binê nameyê komele de pere yeno arêdayene û teberê Cemxaneyî de yeno xerckerdene û vat: ”Komara Tirkîya dewleta qanûn û huqûqî ya. Ma do huqûq û hêzê dewletê bimejnê to û êyê ke sey to yê.”
Federasyonê Elewîyan ê Demokratîkan (FEDA) derheqê babete de eşkerayîye daye. FEDA ard ziwan ke Qeymeqamê Qisle pê hêzê hişmendîya asîmîlasyon û înkarî roja fîraze Xizirî de Cemxaneyê Duzgun Babî tehdît kerd.
FEDA vat: ”O fotograf û vilakerdişê Qeymeqamî vera elewîyan gef o. Selahîyetdarê dewlete vanê pêro hemwelatîyî têdûşt ê la wexto ke babete pawitişê na têdûştîye bena benê înkarker û nîjadpeseret. Qeymeqam hişmendîya faşîste ra hêz gêno.
Ganî cemxaneyan rê cade statuyo qanûnî bêro dayene. Ma vera înkar, teda û asîmîlasyonê dewlete hetê Cemxaneyê Duzgun Babayî de yê. Ma venga pêro dezgehan, pîr, ocaxzadeyanê elewîyan danê ke dormeyê Cemxaneyê Duzgun Babayî de bêrê yewca û tewir bigêrê.” Çime: ANF
