Deşta qezaya Farqînî ya Amedî de germbîyayîşî emserr lez dest pêkerd. Citkaran dest pê çinitişê xele, mercî, êm û cewî kerd. Cayanê ke awdayîş tede ameyo kerdiş de awadayîşê zêdeyî vera mehsul herey yeno çinitiş. Erdê awdaye de 20 rojî ra heta yew aşme çinitiş herey yeno kerdiş. Citkarê ke herême de karê citkarîye reyde meşgul benê, pawenê ke mehsulê emserrî zêde bivejîyo. Citkarî vanê ke mesrefê ronayîşê zadî zêde yo û na rewşe vera citkarî zehmetî ancenê. Krîzê ekonomî serê gubre, dermanê erd, mazot, bezre, yewmîyeyê karkeran û xeylê mesrefanê bînan de tesîr viraşto û se ra 250î ra heta 350 mesref zêde bîyo.

Qezaya Farqînî de vayeya bîçerî ameye zêdekerdiş û nê semedî ra çimê heme citkaran Ofîsê Berardişî yê Herre (TMO) de yo ke vayeya xele, mercî, êm û cewî seba citkaran bêro kêmkerdiş. Derheqê babete de citkaran ra Dîyar Gurmezî qisey kerd û bale ante serê problemê citkaran.

Gurmezî qiseykerdişê xo de ard ziwan ke emserr zî sey serra verêne vayeya her çîyî zêde bena û na rewşe senî ke xeylê esnafan ser de tesîr viraşta, serê citkaran de zî viraşta. Gurmezî wina vat: “Her ke şino vayeya mazot, gubre, bezre û heme kelepulê ke citkarî de lazim kenê, zêde bena û êdî sey verê cû nînê herînayîş. Wexto ke ma payîzî se donim erd de xele ronenê, 400 lître mazot şino. 400 lître mazoto ke şino zî 9 hezar TL yo. Yanî se donim erd de bi temamî 22 hezar û 610 TL mesref şino. Wexto ke ma dest bi çinitişî kenê, ma bi payê qazî bezreyê xo erzenê erd, heme erdê xo raşt kenê û şinê. Wexto ke ma erdê xo raşt kenê û pak kenê, ci ra dima eştişê berzeyî zî asan beno. Vayeya 3 ton xele û gubreyî hema hema seyyewbînan a. Wirdî zî bi 12 hezar TLyî yenê rotiş.”

‘Citkarî kewenê destê bazirganan’

Gurmezî qiseykerdişê xo yê peyênî de vat ke ê nêwazenê citkarî sey serranê verênan bêrê mexdurkerdiş û vat: “Armancê ma no yo ke çîyo ke citkarî wazenê, bi vayeya kême bêrê rotiş. Wa bi zerrîya citkaran bo. Wexto ke mehsul zêde yeno ercankerdiş, na reye citkarî kewenê destê bazirganan û xeylê zehmetîyan ancenê. Nê semedî ra ganî seba citkaran hetkarî bêro kerdiş. Ganî ma citkarî nêrê mexdurkerdiş. No tena problemê citkaran nîyo, ê heme esnafan o zî. Eno krîz serê her ferdê komelî de tesîr virazeno. Ganî hukmat seba citkaran cehd bikero û paştîdayîş bido. Ganî hetkarî bikero ke vernîya ma citkaran nêro girewtiş û ma zî sey her kesî bieşkê bi asanî karê xo bikerî. Ma nêwazenê herr û wareyê xo ra dûr bikewî.”