Şarê êzidîyî nê rojan Çarşema Serê Nîsanê fîraz keno.
Goreyê êzidîyan dinya de wextî 1ê nîsane de dest pêkerd, dinya na roje ronîyaya. Coka êzidîyî menga nîsane sey destpêkê serra neweye yanî sey Çarşema Serê Salê fîraz kenê. Goreyê êzidîyan viraştişê dinya 7 rojan de qewimîya. Êzidîyî wina bawer kenê ke dinya yewîya nakokîyan ra yena pê. Coka rengo sûr Homayî û rengo sipî zî Melega Tawusî temsîl keno.
Sembolanê Çarşema Serê Nîsanê ra yew zî hak o. Goreyê bawerîya êzidîyan dinya verî hakêko nêpewte bîye û dima zî gan kewto zereyê ci. Êzidîyî nê roşanî de hakan boyax kenê û na aktîvîte zî yena manaya ‘dinya tarîye ra xelisîyaye, bîye rengin û wisar dîya.’
Çarşema Serê Nîsanê rê “Çarşema Nîsanê”, “Çarşema Serê Salê” “Çarşema Sor”, “Çarşem Çarşem”, “Uxur Çarşem” û “Qera Çarşem” zî vajîyeno.
Wextê xirîstîyanîye de roşanê Çarşema Serê Nîsanê yeno qedexe kerdene û wina ferman dîyeno ke eke êzidîyî nê roşanî fîraz bikerê wa bêrê qetilkerdene. Xirîstîyanî wazenê ke rîtuelê êzidîyan bigêrê. La êzidîyî nê rîtuelê xo pawenê. Xirîstîyanî vanê ”Şima zûran kenê, serê 1ê nîsane de nê, rojbîyayîşê Îsayî de dest pêkena.” Xirîstîyanî 1ê nîsane sey roja zûran îlan kenê.
Êzidîyî menga nîsane de nêzewijîyenê, çîyêkî fîraz nêkenê. Goreyê êzidîye dinya cinî ya û menga nîsane de na cinîye tim çîyanê weşan dana. Rîtuelanê Çarşema Serê Nîsanê de zî cinîyî serkêşîye kenê. Na menge de êzidîyî destê xo nêdanê xoza û sey Rayberê Şarê Kurdî Abdullah Ocalanî domanê ke nîsane de benê, sey bitelehî pênase benê.
