Yew bizi û di bizîkê yay benê. Nomey yew bizîkî Helîç a, yew Belîç a. Bizi şona çerena û yêrey yena, şit dona bizîkon xu. Her roj onawa kena. Bizîkon xu ra vona:

-Yew ome ber vîye, şima dey rê ber nêakî ha, cinawir xapîneno. Vengê mi barî yo.

Yew roj bizi şona, cinawir veyneno ke bizi ha şona yabon. Şona qula bizîkon ver. Vono:

-Ez may şima yo, ez şîyo çerayo, şit kewto çicondê mi. Ber akî, şit borî.

Bizîkî vonê:

-Ney ti may ma nîya. Vengê tu qalin o, ti cinawir î.

Cinawir ageyreno tapa û tikê ra dima hewne yeno. Vengê xu barî keno û venda bizîkon dono vono:

-Bêrî mi rê ber akî!

Bizîkî vonê:

-Hela lingon xu zî ma nawni.

Cinawir lingonê xu binê ber ra înon nawneno. Bizîkî vonê:

-Lingê tu sîya yî, lingê may ma sipî yî. Ti cinawir î.

Cinawir şono tikê ariş gîno lingon xu rê keno, lingon xu sipî keno ew yeno. Yeno vono:

-Ez may şima wo. Ez omew şit dekewto çicondê mi ez şit dona şima.

Yê vonê:

-Hela lingon xu ma nawni. Cinawir lingon nawneno.

Yê vonê:

-Willay may ma ya.

Ber akenî ki cinawir o. Cinawir wirdînî gonî gonî war keno û şono. Bizi yena eki bizîkî qul de nîyê. Vazdona vazdona şona lîyi veynena. Vona:

-Lîyey tu bizîkî mi werdî?

Lî vona:

-Nê willay mi nêwerdî.

Vazdona şona heşi veynena. Vona:

-Heşow tu bizîkî mi werdî?

Heş vono:

-Willay elbê mi tede çin o.

Şona quley cinawirî ser o “rep rep rep” veng vejena. Cinawir vendeno vono:

-Rep tep meki, her rişena û dekuwena nonê mi.

Bize vona:

-Vejî teber, tu bizîki mi werdî.

Cinawir yeno teber bizi rê sond oneno vono:

-Goştê bizîkon tu nêkewto dindonon mi mîyon. (Raşta zî nêkewto dindonon ey mîyon, çimkî gonî gonî bizikî war kerdî, nêcawitî.)

Bizi vona:

-Ma şîrê şeriet.

Yewno gîne şonê şeriet. Cinawir yew meşke pirê fison keno û şono. Bizi zî yew elba şitî gîna şona. Gînê benî donê mellayî. Mella şitê xu weno û meşki akeno ke ti ra yew bûya pîs yena. Ageyreno vono:

-Ma dindonon cinawirî kaş kenî û qoçon bizi tîj kenî. Şima gulaş gînê û kom qezenç ke o heqlî yo.

Dindonon cinawirî kaş kenî û qoçon bizi tîj kenî. Bizi û cinawiri dexwa kenî. Bizi qoçon xu dona pizey cinawirî ro qul kena. Helîç vir bena yew kinar, Belîç vir bena yew kinar. Bizi persena vona:

-Şima şî kure?

Ê vonê:

-Ma şî key xaloy.

Bizi persena:

-Xaloy çi da şima?

Vonê:

-Xaloy belxul da ma.

Bizi vona:

-Qey şima tikê may xu ri zî nêa?

Vonê:

-Lîye lîye ma dekerdinî destê xu destê ma veşnayî. Ma nişna bîyero.

Çime: Mehmet Selîm Sert, Folklorê Pîranî, Weşanxaneyê Vateyî, Stenbol, 2024, rr. 82-85.