Ravêrayîşê pêvajoyî de dewlete hema zî yew game nêeşta, la se beno, werte de çîyêk nêaseno. No merhele her ke şîyeno hîna zaf xidar beno. Şero taybet heme hetan ra kayê xo yê qilêrinî dewam keno. Darbeya qeyûman peyda pey rayîrê xo akena û hêdî – hêdî sewbîna şaredarîyan ra xo hedre keno. Hetê bînî ra zî operasyonê leşkerî û qirkerdişê sîyasî de rojê homayî çin o ke kesêkî bitepişê û tewqîf bikerê. No tewr rewşa qilêrine de ana aseno ke yew çîyo baş avereyî de nêaseno. Hikûmatê şerê taybetî şimşêrê xo anto û gala heme kesan keno. Yew şîyayîşê pêvajoyî est o, la hema zî nameyê nê pêvajoyî çinî yo. Heyetê Îmrali heme sazîyan û partîyan reyde pêvînayîşê xo qedêna. Heyet eno raya hîrêna ke şîyo Îmrali û hûmara heyetî bîye 7 kesî. Her kesî no warî de nefesê xo giroto û goşê xo akerdî. Heyetê Îmrali eşkerayîya Rayverê PKKyî Abdullah Ocalanî 27ê sibate de wende. Wendişê eşkerayîye de wayûbirayîya tirkan û kurdan nîşan dîyaye û ame vatene ke ganî PKK kongreyê xo virazo, çekan rono û xo fesh bikero. Wa hetê sîyasetê demokratîk û huqûqî bêro naskerdene. Rayverê PKKyî Abdullah Ocalanî eşkerayîya tarîxî kerde, la tira dime se beno? Eke dewlete hetê ravêrayîşî ra gamêke nêerzena û senîhewa yew netîce vejîyeno raşte? Mûxatap kam o? Mûxatap Erdogan o, Bahçelî yo, na zî dewleta xorîn a, hema zî dîyar nîyo. Bahçelî ra qet veng nêvejîyeno û Erdogan zî şerê taybetî de israr keno. Ancî zî goreyê vatişan ra “vanê AKP mîyane de yew klîq est o û nêwazeno ke şer vindo.” No vatiş çiqas raşt o û hema zî dîyar nîyo. No tewr ravêreyî de tam yew teşqele est o. No teşqele senîhewa ravêreno û o zî dîyar nîyo. Nê warî de hetê vatişê şarî ra, ravêrayîşê pêvajoyê newî ra, ne hêvî est a û ne zî bawerî est a. Nê warî de kamî ra ke ma bipersê, eynî çî vanê, vanê “ma bawerîya AKPyî nêkenê û werte de ancî yew kayo qilêrin est o û averîyî de yew şewq çinî yo û nêaseno. Çimkî tecrîd hema zî nêwederîya yo”.
Nê warî de ganî şar bawerîya xo bikero û şewqê xo bido têkoşînê xo. Nê ravêrayîşê pêvajoyî de dewlete şîya linganê Rayverê PKKyî Abdullah Ocalanî ver û vato ganî Ocalan nê şerî vindarno. Enka zî sakî kurdî mecbûr mendî ke dewlete ra yew hêvî bipawê. Şero taybet anahewa yew polîtîkaya qilêrine gurênena û şarî mîyanî de yew fitne virazena û şarî eciz kena. Şaro kurd na polîtîkaya qirêjî ra hînê mird bîyo. Şero taybet çi keno, wa bikero, ma polîtîkaya fitne û fesadî nêtepîşena. Şero taybet darbeya qayûman ra û operasyonanê qirkerdişan ra nêeşkeno ke moralê şarê kurdî xirab bikero. No şar o ke çewres serrî yo ke şerê taybetî reyde şer keno, xo heme hetan ra ceribnayo. Rayverê PKKyî çi eşkerayîye bido, heme şaro kurd peyê na eşkerayîye de yo. La dewleta tirkan mîyane de anaser yew yewbîyîş çinî yo û heme hetanê înan ra yew feko çewt est o û heme qirêjîya xo îspat keno.
Şaro kurd dewlete ra bawer nêkeno, la verê Rayverê xo ra û dime ra bawer keno, na menga adare de. Vernîya şarî de Roja 8ê Adare est a û pîrozîya roşanê Newroze est a. 21ê Adare de şaro kurd ancî heme hewa ra morê xo dano adirê Newroze ra, şewqê xo dano heme koyanê azadî û tepişteyanê azadîye ra. Serkewtiş zaf nizdî bîyo. Kilaya adirê Newroze heme kurdan û şaranê bindestan ra xelasîya serkewtişî virazena.
