Wayîrê Îmtîyazî yê Rojnameyê Xwebûnî Kadrî Esenî dîyar kerd ke vera rojnameyê Xwebûnî astengîyî estê û wina qisey kerd: “Se beno wa bibo ma do weşangerîya kurdkî rê dewam bikerê.”

Wayîrê Îmtîyazî yê Xwebûnî Kadrî Esenî derheqê babete de ANFyî rê qisey kerd.

Esenî da zanayene ke rojnameyê înan zaf reyî raştê tedayan ameyo û vat: “Mi çend reyî asayîş de îfade da. Nika xîret yeno kerdene ke Xwebûn bi temamî bêro astengkerdene. Êlule, teşrîna verêne û na menge de otogarê Amedî de polîsan xîret kerd ke rojnameyê ma nêşawîyo şaristananê bînan. Wexto ke ma waşt ke bi rayîrê avûkatanê xo agahîyan bigêrê musayî ke verî zî polîsan dest nayo rojnameyê ma.

Seba ney yew sebebê înan o eşkera zî çin o. La ma armancê înan hol zanenê; ê xîret kenê ke rojnamegeranê kurdan bitersnê û weşangerîya kurdkî asteng bikerê. Şert û mercî se benê wa bibê ma do rojnamegerîye rê dewam bikerê.”

Esenî pare kerd ke polîsî fîrmayanê ke rojnameyê Xwebûnî kirişenê tehdît kenê û vat ke ganî fîrmayî apey game meerzê çunke rojnameyê înan legal o la kerdişê polîsan legal nîyo.

Esenî ard ziwan ke vera pêro astengîyan xîretê înan ê huqûqî dewam kenê û vat: “Ma do tim bi ziwanê xo yê dayîke weşangerîye bikerê. Ma do karê xo hîna xurtî ra bikerê û vera nê kerdişan bi huqûqî têbigêrê. Se beno wa bibo ma do weşangerîya kurdkî rê dewam bikerê.”