Li navçeya Arnavûtkoyê ya Stenbolê duh di saetên nîvro de komeke nijadperestan êrîşî wesayîta anonsa hilbijartinê ya Partiya Çepên Kesk kir. Êrîş li taxa Îslambey pêk hat û di êrîşê de şoforê wesayîtê Kamûran Guneşê endamê partiyê birîndar bû. Hat zanîn ku bi tevir û bêran li Guneş xistin. Êrîşkar ji cihê bûyerê reviyan. Guneşê birîndar bû jî rakirin Nexweşxaneya Dewletê ya Arnavûtkoyê.

Rapora nedan

Piştî bûyer hat bihîstin Hevberdevkê Partiya Çepên Kesk ê Navçeya Arnavûtkoyê Yavûz Kahraman û şandeya pê re çûn nexweşxaneyê. Xebatkarê nexweşxaneyê got ku kesekî bi navê Kamûran Guneş neanîne nexweşxaneyê. Li ser israra şandeyê rayedarên nexweşxaneyê diyar kir ku polîsan Guneş ji nexweşxaneyê derxistiye û biriye qereqolê. Guneş bi awayek birîndar li qereqolê hatiye ragirtin û hat zanîn ku nexweşxaneyê rapora lêdanê nedayê. Tê payîn ku piştî karûbarên li emniyete Guneş bibin Edliyeya Gazîosmanpaşayê.