Parlamenteranê huqûqnasan ê DEM Partî ra Serhat Erenî ANFyî rê derheqê tecrîdê Îmraliyî de qisey kerd.

Serhat Erenî ard ziwan ke polîtîkaya tecrîdî têna bi şertanê Îmraliyî sînordar nîya û vat sey mekanîzmaya kontrolî heme komelî ra vila bîye û açarîyaye stratejîya îdareyê pêroyî yê welatî.

Erenî nê vatî: ”Tecrîd têna kesêkî sey fîzîkî îzole nêkeno, stratejîya dahîna xorî temsîl keno. Bi tecrîdî yeno waştene ke waştişê azadîye û demokrasîyî şarê kurdî û heme bindestan bêro fetisnayene. Armanc oyo ke muxatabê têkoşînê azadîye yê kurdan bêro bêvengkerdene û verê têkoşînî bêro girewtene. Wazenê komelî bikerê bêhêvî. No tecrîd têna vera estbîyayîşê fîzîkî yê Ocalanî nîyo, kenê ke paradîgmaya ci ya neteweya demokratîke bikerê bêtesîr û îradeyê şarê kurdî bişiknê. Ewro têna zîndanan de nê her warê Tirkîya de tecrîd est o. Şar hinî nêeftano fîkrê xo bîyaro ziwan.

No sîstem merdiman têna verdeno û keno bêveng. Bi xorîbîyayîşê tecrîdî zextê serê komelî zêdîyeno. Tewr zaf cinîyî yenê hedefgirewtene. Seba ke Ocalan azadîya cinîyan keno merkezê azadîya komelî no sey tehlukeyî yeno vînayene. Coka pîya bi xorîbîyayîşê tecrîdî şîdet û zextê vera cinîyan zî zêdîyeno. Kurdîstan de bi metodanê şerê taybetî ciwanî yenê hedefgirewtene. Bi narkotîk û fuhuşî kenê ke ciwanan erjanê ci ra bifînê dûrî, bikerê bênasname. Bi tecrîdî wazenê komelî bigîrê binê kontrolî.”

Erenî bale ante qerarê ‘heqê hêvî’ yê Mehkemeya Heqanê Merdiman a Ewropa (MHME) ser û vat: ”Tirkîya qerarê ‘heqê hêvî’ nêard ca. Seba ke no heq Ocalanî rê nîno naskerdene hem huqûq hem zî heqê merdiman yenê binpaykerdene. Çi heyf ke MHME û Konseya Ewropa vera nê binpaykerdişî nêşinê Tirkîya ser û gamêka pête nêerzenê. Çunke Tirkîya ra menfaetê înan est o. Tecrîdê serê Ocalanî têna meseleyêka huqûqî nîya, eynî wextî de parçeyêkê hesabpersayîşê sîyasîyî ya. Dezgehê Ewropa na babete de zaf nêşinê Tirkîya ser. Des serrî yo gamê ke hewce kenê nêameyî eştene no zî mojneno ke huqûq xizmetê sîyasetî keno.”