Hemserekê Heyetê Têkilîyanê Teberî yê Îdareyê Xoserî Abdulkerîm Omerî derheqê hêrişanê Tirkîya ser o qisey kerd u vat: “Erdogan weçînayîşê 2023yî ra ver wazeno pêro Kurdistan û kurdan îmha bikero.”
Hemserekê Heyetê Têkilîyanê Teberî yê Îdareyê Xoserî Abdulkerîm Omerî derheqê gefanê neweyan ê dewleta tirke yê vera Rojawanî de cewab da persanê ANFyî.
Abdulkerîm Omerî îfade kerd ke gefê Erdoganî newe nîyê û Erdogan nika wazeno krîzê Rûsya-Ukrayna xo rê bivurno firsendêkî. Omerî vat: “Erdogan rewşa tewrbîyayîşê Swêd û Fînlandîya yê NATOyî zî şuxilneno. Dewleta tirke wazena bi rayîrê komployan erdê Sûrîye îşxal bikera. Wazena NATOyî zî tewrê nê komployî bikera.”
Omerî bale ante peymananê adirbirnayîşî yê 17 û 22ê teşrîna verêne ya 2019î ser û vat: “Ma binê garantorîya Amerîka û Rûsya de peymanî îmza kerdî. Sey Îdareyê Xoserî û QSDyî ma goreyê na peymane têgêrenê. La dewleta tirke tim Rojawanî dana bombayan ver, sivîlan qetil kena û herêmanê îşxalkerdeyan de demografî vurnena. Wird dewletê garantorî zî vera nê kerdişanê dewleta tirke bêveng ê. No zî tesdîqê înan eşkera keno.”
Abdulkerîm Omerî da zanayene ke Erdoganî projeyê cadayîşê 1.5 mîlyon multecîyan cara ardo ca û vat: “Verî Efrîn de nufusê kurdan se ra 97 bi nika tewr zaf se ra 20 o. Pratîk de dewleta tirke vurnayîşê demografî kena. Projeyo newe yê îşxalî yê dewleta tirke tay tehlukeyan zî xo de ano. Erdogan wazeno 1.5 mîlyon multecîyan tîya de ca bikero. Xora ma wazenê multecîyî abigêrê la ganî her kes cayê xo yê verênî de bêro cakerdene.”
Omerî ard ziwan ke dewleta tirke wazena DAIŞî gandar bikera û vat: “Hêrişê îşxalî yo newe yê dewleta tirke têna tesîrê ma nê tesîrê pêro Rojhelatê Mîyanênî û dinya bikero. Erdogan weçînayîşê 2023yî ra ver wazeno pêro Kurdistan û kurdan îmha bikero. Gefê Erdoganî têna xizmetê DAIŞî kenê. Ma do hetê dîplomatîkî ra kar bikerê, reyna welatanê garantoran de têkilîye virazê, mesajanê xo biresnê Neteweyanê Yewbîyayeyan û Yewîya Ewropa. Şarê kurdî û Sûrîye wa vera îşxalêkê neweyî tewirê xo bimojno. Ez venga kurdanê dîaspora zî dana ke biherikê waran, vera gefanê îşxalî çalakîyan bikerê. Hukmatê Şamî zî vera nê gefanê serê serdestîya Sûrîye ganî wayîrê tewirêkî bo. Yewîya Ewropa û Neteweyê Yewbîyayeyî ganî verê gefanê îşxalî yê Tirkîya têgêrê.”
