Dewleta tirke ya faşîste, konseptê çinêkerdişî yê şarê Kurdî bi paştîdayîşê NATO serra 2015î de da rejîmê AKP-MHPyî. Bedelê nê karî de zî, heme îmkan û sazîyê dewlete devistî binê kontrolê AKP-Erdoganî. Hem dizdî, talan û bêrayîyanê Erdoganî rê, çimî ameyî girowtene. No konsept, Îmralî ra bi tedayanê ro ser Rayverê Şarê Kurdî Abdullah Ocalanî ame destpêkerdene û ro heme zîndanan û civatan de ame vilakerdene. Bado ke hesabê “ma bi destê DAIŞî nê konseptî bi ser bifînê” têk şî û DAIŞ ame têkberdene, rejîmê AKP-MHPyî bi heme îmkananê dewlete û paştîdayîşê hêzanê mîyanneteweyîyan bixo kewt dewreye.
Vatişê Suleyman Soysûzî yê “serra 2016î de do PKK bi çinêbîyayîşî reyde rîbirî bibo, serra 2017î de do êdî kes nêşiko nameyê PKKyî bîyaro ziwan, serra 2018î de do PKK biqedîyo û serra 2020î de ez soz dana do PKK nêmano” pûç vejîyayî.
23ê nîsana 2021î de çarçoveya heman konseptê NATOyî de êrişê Garê û dime ra zî Heftanîn, Metîna û Zapî ame kerdene. Dewleta tirke rixmê heme hetkarîya NATOyî, sîlahanê tewir averkewteyan, hêzê hewayî û bikarardişê sîlahanê kîmyewîyan, dorêka bîne têk şîye û bi ser nêkewte. Di serra 2022î de Ukrayna reyde ke bala heme dinya nê şerî ser o bî, 17ê nîsane de êrişêkê bînî yê serra 2021î verhîrayêrî da destpêkerdene.
Di nê êrişî de îxanetê PDK û paştîdayîşê hukumatê Kazimî zî defîya merîyete. Dewleta tirke êdî vakurê Kurdistanî ra nê, baregehanê leşkerî yê vaşûrê Kurdistanî yê de binê kontrolê PDK ra ameyêne wereznayene û tewrê êrişan bîyê. 40 rojî zêdêrî yo, gerîlayê azadîye bi xoverdêrîyêka bêsaloxe ke dinya de bênimûne yo no hesab zî têk berd. Roje de bi desan îşxalkerî yenê kiştene û di nê 40 rojan de 500î zêdêrî îşxalkerî ameyî kiştene.
Erdogano ke sozê tasfîyekerdişê têgêrayîşê azadîye û temamkerdişê planê qirkerdişî dabî hetê aborî, sîyasî, civatî û dîplomatîkî ra kewt mîyanê krîzêkê pîlî. Bi sebebê bêrayî û şantajanê koçberan ê verva Ewropa, êdî di qada mîyanneteweyî de zî bawerîye bi Erdoganî nêmende û seba dorêka bîne ameyîşê weçînayîşî hetkarîya mîyannetewe zî nêmende. Zê heme hukumatanê ke bi hedefê tasfîyekerdişê PKKyî û qirkerdişê şarê kurdî amebî karî ser, hukumatê Erdoganî zî ame peynîya emrê xo. Erdogano ke heta qirika xo di mîyanê dizdî, talan û pîsîtîyan de yo zaneno eke îqtîdarî ra bikewo bi aqûbetê Menderesî reyde rîbirî yo. Bi no sebeb seba nêşîyayişê weçînayîşî yan zî dorêka bîne biserkewtişî, Erdoganî rê şerêk lazim o.
Erdogan di êrişanê vaşûrî de bi ser nêkewt û êdî cenazeyî nînê limitene. Medyaya dijîtale ser ra her roje kişte û dirbetinê artêşa îşxalkere yenê vilakerdene. HPG her roje hûmara kişte û dirbetinan eşkera keno.
Di no wexto ke destê Erdoganî de tu çîyêk nêmend endamîya dewletanê Swêd û Fîlandîya ya NATOyî ameye rojdem. Erdoganî rê firsendêkê şantajî yo bîn vejîya û Erdoganî êrişê verva Rojava ard rojdem. Erdogan wazeno naye zî seba planê xo bi kar bîyaro û vano: “Ez endamîya Swêd û Fîlandîya ya NATOyî qebul nêkena”. Mexsedê Erdoganî di planê xo yê qirkerdiş û çinêkerdişê destkewteyanê şarê kurdî de na dore zî na karte bi kar bîyaro û bazar keno.
Erdogan wazeno verva Rojava êrişêkê pîlî bido destpêkerdene. Zê Efrîn, Girê Sipî û Serêkanîye bi îşxalkerdişê çend bajaran serkewtişî bi dest bifîno û şêro weçînayîşan. Erdoganî di qiseykerdişê xo de vatbî ma do di Kombîyayîşê Desteya Mîllî ya pancşemeyî qerar bidê.
La konjonktorê herême û cîhanî aloz o. Rûsîya bi sebebê şerê Ukrayna hêzê xo tayê cayan ra antî û teslîmê Îranî kerdî. Emrîka, dorêka agêrêna Rojava. Mudaxeleyêkê Tirkîya yê Rojava do herême de rewşe zafêrî aloz bikero. Do Îran, Tirkîya, Sûrîya û Îsraîl bêrê têduşt. Yanê destpêkerdişê êrişî bi goreyê destûrê Emrîka û Rûsîya yo. Seba ke Tirkîya şerêk bido destpêkerdiş gere teyareyan bi kar bîyaro. Eke Emrîka û Rûsîya destûrê naye bidê, do emşo zî êriş bikero. QSD zî vano ma heme êrişan rê hedreyê û cewabo ke hewce keno ma do bidê. Bi vatişêko bîn eke şer bivejîyo do şerêko pîl û giran bo. Bi no sebeb rayirberê KCKyî tim vanê no şero ke verva şarê kurdî ameyo destpêkerdene şerê mendiş û nêmendişî yo. Hem seba îqtîdarê Erdoganî û Tirkîya û hem zî seba şarê kurdî. Bi hêzanê mîyanneteweyan bawerî nêbena û gere her kurdêk her cayî de çîyo ke keweno milanê ey ser pêk bîyaro…
