Çend rojî verî Namzedê Serekkomarîye Kemal Kiliçdarogluyî pay na serê secadeyî û no dîmen rayaumûmîye de xeylê ame nîqaşkerdene. Namzedo bîn Tayyîp Erdoganî no firsend nêperna û dest pê şuxilnayîşî kerd.
Namzedê Serekkomarî yê Îtîfaqê Miletî Kemal Kiliçdaroglu çend rojî verî tewrê bernameyêkê fitarî yê Partîya Saadetî bî. Fitarî ra dima tayê fotografî antî. Dîmenan de eşkera bî ke Kiliçdarogluyî pay na serê secadeyêkî. Bêguman Kiliçdarogluyî uca de hem hetê sîyasetî ra hem zî hetê îtîqatî ra xeletîyêka girde kerdbî.
La ey bixo zî xeletîye qebul kerde û na eşkerayîye kerde: “Ez xemgîn a. Seba ke mi secade nêdî, ez zaf xemgîn a. Ez nêwazena na dinya de kesêkî bidejnî, hela şarê xo bincaran. Ez tîya de keso ke îtîqatî şuxilneno û aparatê propaganda yê ke şuxilîyenê wîjdanê şarê ma rê veradana.”
Hîle-î şerîyye
Namzedê Serekkomarî yê Îtîfaqê Cumhurî Tayyîp Erdoganî no firsend qet nêperna. Cade vejîya sehne û dest pê “hîle-î şerîyye” kerd. Xora na babete de hunerê Erdoganî xeylê zaf ê. Çimanê ey de pêro sembolê îtîqatî sey berhemî yê. O metakerdişê îtîqatî de hunerin o. Dîmenê Kiliçdaroglu ra dima qezaya Bagcilarî ya Stenbolî de tewrê komakerdişî bî. Uca de secadeyêk girewt xo dest û vera girseyan sana ra.
Ey vat ke o do 15ê gulane de serê secadeyî de nîmajê şukrî bikero. Şar êdî zano ke Kiliçdaroglu elewî yo. Coka Erdogan hîsanê şarî şuxilneno û mabênê îtîqatan de dişmenîye ramneno.
Serra 2015î de Quran şuxilîya
Erdogan têna nika nê, weçînayîşanê 2015î de zî îtîqat şuxilnabî. Mîsal gulane 2015 de şî Riha û uca de destê ey de Quran estbî. Erdoganî wina qisey kerdbî: “Eke ti kalik yan babîyê xo ra Quranî musena/musenî, Quran se vano ti wina kena/kenî.” Tîya de oncîna îtîqatî dayî pêrodayene. Eke cayêkî de aştîye esta, uca de Erdogan îqtîdarê xo vîndî keno. O têna dişmenîye û şerî ra hêz gêno. Bi nê hawayî vernîya çimanê şarî de cîyakerîye keno û îtîqatê merdimî reyde kayê xo keno. Na polîtîkaya binkor a.
Zurê Parkê Gezî
Serra 2013î de zî ma raştê şuxilnayîşê sembolanê dînîyan amebî. Zanîyeno ke hezîrane 2013î de Stenbol de Raşteyê Taksîmî de Parkê Gezî de hemverê hukmatê Erdoganî xoverdayîşêko gird qewimîya. Çike hukmatî waşt parkî wedarno û herinda ey “leşkergehe” awan bikero. Birastî armancê hukmatî yo sereke awankerdişê leşkergehe nêbî. Ey waştêne binê nameyê leşkergehe merkezê girewtiş-dayîşî virazo û rant peyda bikero. Girseyê demokratîkî û dînamîkê çepgirî vera nê qerarî vejîyayî û înan Rasteyê Taksîmî de nêzdî 15 rojî xoverdayîşo tesîrdar kerd. Polîsanê Erdoganî vera çalakîvanan şîdetêko gird şuxilna û 11 merdimî qetil kerdî. Erdoganî seba ke xoverdayîşî xirabin bikero, xeylêk vatişê dînî “berardî”. Mîsal Erdoganî dîyar kerd ke çalakîvanan Camîyê Bezm-î Alem Valîde Sultanî de şimita alkoline şimitê. Labelê Muezînê Camî Fuat Yildirimî eşkera kerd ke kesî camî de şimita alkoline nêşimite. Yanî Erdoganî zure kerde. Zura bîne ya Erdoganî derheqê cinîyêka çîtikeyine de bîye. Ey vat ke cinîyêka çîtikeyine Kabataş de ameye cibijîyene û kutayene. Na zure zî badê ke dîmenî peyda bîyî eşkera bîye.
