Unîversîteya Hamburgî de konferansê “Ma Dinyaya Xo Apey Wazenê” bi destê Tirkîya ame astengkerdene.

Rêzê konferansanê “Vera Modernîteya Kapîtalîste Vejîyayîş” 2012, 2015 û 2017 de Unîversîteya Hamburgî de dîyayî û goreyê planî zî emser 7-9ê nîsana 2023yî de bi sernameyê “Ma Dinyaya Xo Apey Wazenê” do biameyêne kerdene. La konferans bi xîretê îstîxbaratê Almanya hetê Rektorê Unîversîteya Hamburgî Prof. Dr. Hauke Heekeren ra ame astengkerdene.

Konferans hetê Komîteya Wendekaran (AStA), Torra Cigêrayîşê Alternatîfî û Înîsîyatîfê ‘Kurdistanî rê Aştîye, Ocalanî rê Azadîye’ ra ameyêne serûberkerdene.

Beşdaranê nê konferansî ra Prof. Norman Paechî derheqê babete de ANFyî rê qisey kerd.

Paecho ke verî Unîversîteya Hamburgî de akademîsyen bî, bira rektorîye bi xurtî şermezar kerde û vat: “Na bire vera zanistê azadî darbeyêk a. Mi verî zî nê konferansan de qisey kerd. Seke îstîxbarat û rektorîye îdîa kerd nê konferansan de qetî propagandaya PKKyî nêameye kerdene. Nê konferansan de sey meseleya kurdan tay meseleyan rê tim çareserîye gêrîyaye. Aseno nîqas û astanê konferansanê ma tay kesî tersnayê û coka tedaya îdareyî ameya kerdene.”

Prof. Paechî da zanayene ke konferans waştişê dewleta tirke ser o ameyo astengkerdene û vat: “Aseno ke nê serran de rejîmê Erdoganî destê xo resnayo heta zanîngehê mi. Ez şermayena ke waştişê Erdoganî ser o rektorîye birêka winayêne daya. Ganî dezgehê dewleta Almanya û rêxistinî şikanê xo yê vera têgêrayîş û rêxistinanê kurdan ra fek vera bidê. Kurdî wazenê pê nîqaşanê zanistî meseleyanê xo çareser bikerê la ê ma ney asteng kenê. No seba dinyaya zanistî şermêka pîl a.”