Şanoger ango lîstikvan Erdal Kaya ji nişke ve derket ser dika şanoya kurdî. Di demeke kurt de bû lîstikvanekî ku kurd pê serfiraz û kêfxweş in. Kaya hem li ser dikê şanoyê û stand upê dike hem jî di gelek fîlman de bir ola xwe rabû. Bi taybetî Erdal Kaya bûye pira lîstikvaniya navbera Batman û Amedê. Geh li Batmanê xebatên şanoyê dike geh li Amedê li ser dikê ye û xelkê dikenîne û bi tevger û lîstikvaniya xwe xelkê kêfxweş dike. Mirov dikare bêje ku Erdal Kaya heqê şanoya kurdî didê. Erdal Kaya di rojên karantînayê de nesekinî û bi hevalên xwe re bi navê “Şildim Bildim” bernameyek amade kiri ku her hefteya li ser qenala Hestû TV dihat weşandin.
Ew hem di warê şanoygeriyê de bi Yenîsehneya Batmanê re dixebite û şanoyê dike û hem jî li Şanoya Bajêr Amedê dixebite û şanoyê dike. Her wiha Erdal tenê şanoyê nake, bi skeç û vîdeoyên xwe yên pêkenok li ser medya dîjîtal ji bo kurdan bûye herkek ango modayek. Her wiha ew di gelek skêçên Hinek Henek de cih girt, di rêzefîlmên Îşev, MiGoo de cih girt. Her wiha di fîlmê “Navnîşan” ê Aram Dildar de jî cih digire.
Erdal Kaya bi gelek peyvên ku di lîstikên şanoyê û fîlman de got, di nav ciwanên kurd de belav bû û ew peyv ketin ser zimanê gelek kesan. Gelek kes lîstikvanî û karakterê fîlman a Kaya serkeftî dibîne.
Lîstikekje têr û tije
Niha jî ew bi lîstika xwe ya şexsî ango Stand-Upa bi navê “Vik û Vala” derdikeve ser dikan. Lîstik derdora 80 deqîqeyî berdewam dike û gelek mijarên ji hev xweştir û balkêştir di nav lîstikê de hene. Kaya di lîstikê de li ser mijarên wek civakî, aborî, siyasî û hwd. rawestiyaye. Ji serî heta binî lîstik bi sehneyên pêkenok tije ye. Ev lîstik ji aliyê Erdal, hevjîna wî, birayê wî û jinbira wî ve hatiye amadekirin. “Vik û Vala” heta niha li Batman, Amed, Mêrdîn, Sêrt, Wan, Stenbolê derketiye ser dikê û dê îro û sibê jî li Îzmîrê derkeve pêşberî temaşevanan.
Kaya piştî li ser dika Şanoya Bajêr a Amedê derket pêşberî temaşevanan, ji Ajansa Mezopotamya (MA) Bilal Guldem re axivî.
Kaya diyar kir ku bi salan e ew şanogeriyê dike, dema zanîngehê li Afyonê zanîngehê diqedîne vedigere welat û bi zimanê dayika xwe şanoyê dike. Kaya dibêje ew li Batmanê hem bi Yenîsahne re hem jî li Amedê bi Şanoya Bajêr re dixebite.
‘Vik û Vala’ bajar bi bajar digere
Kaya anî ziman ku fikra vê stand upa kurdî “Vik û Vala” du sê sal bû di hişê wî de hebûye û got: “Em weke komekî vî karî dikin. Em çar kes in, ez û hevjîna xwe û birayê min Rênas û hevjîna xwe cih digirin. Em rûniştin me lîstik nivîsand, amade kir. Kengê ew wext hat min got êdî dikarim derkevim ser dikê. Ev du meh in li ser dikan stand upê dikim. Heta niha li Batmanê, Amedê, Mêrdînê, Wanê, Sêrtê derketim ser dikan. Her wiha ji 6-7’ê hezîranê li Stenbolê û 8-9’ê hezîranê jî li Îzmîrê derdikevim ser dikê.”
Kaya bal kişand ser eleqeya temaşevanan a bo lîstikê û wiha domand: “Eleqe û coşek zêde ji bo stand-upa me heye. Dema ez wê coşa temaşevanan dibînim, ez jî bi coşeke xweş dilîzim. Heta niha her tişt bi dilê me bi rê ve diçe.”
‘Her kes bîranînek xwe di lîstikê de dibîne’
Kaya anî ziman ku ew bi vê stand-upê dixwaze her kesek ango kurdek ji jiyana xwe tiştek jê derxe û bîranîneke xwe tê de bibîne û wiha axivî: “Her kesê ku temaşe dike, dibêje civata me, malbata me wisa ye. Ez behsa salên 90’an dikim, ez behsa salên 2000’an dikim. Kurd xwe li ser dikê dibînin. Beşek ji lîstikê jî li ser ‘nasnamebûnê’ ye. Meseleya nasnameyê bi hemû kurdan re heye. Di wan salan de kîjan kurd çûye ku navê zarokên xwe bi kurdî deyne lê kurdî qedexe bûye. Navên bav û dayikên me qebûl nedikirin. Memûrên li nifûsê nav li zarokan dikirin.”
‘Kî ji lîstikê çi peyamê bigire’
Kaya dibêje her çiqas ew ne siyasetmedar be jî lê belê bivê nevê meseleyên siyasî di jiyana wan de cih digirin û her roj bi geşedanên siyasî re rû bi rû dimînin. Kaya diyar kir ku kê ji xwe re ji lîstikê çi girt, peyama wî ev e û got: “Ez nikarim bêjim ez vê peyamê didim temaşevanan. Temaşevan ji xwe re ji lîstikê çi sûd werbigire ew e.”
Kaya da zanîn ku senaryoyek amade kirine heye û wiha pê de çû: “Lê ez bixwazim nexwazim jî carinan li ser dikê hin tiştên jixweberî jî li lîstikê bar dikim.”
‘Stand-up formeke nêzî kurdan e’
Kaya bal kişand ser têkiliya di navbera kurdan û stand-upê de û wiha got: “Stand-up formeke nêzî kurdan e. Ji Murat Batgî vir ve, çend stand upê din jî çêbûne. Mamoste Ozcan Ateş jî çêdike. Lê valahiyek di vî warî de hebû. Stand-upa kurdî gelek kêm bû. Ez dixwazim ev stand-up bibe mînak û hin kesên di dilê wan de hebe û çênakin jî, bila çêbikin. Ez wisa bi bawer im wê stand-up di nava kurdan de zêde bibe û hewce ye jî. Divê stand-up zêde bibe û ew valahî jî bê girtin.”
Dixwaze stand-upê bidomîne
Kaya destnîşan kir ku ew her car notên xwe digirin û wiha got: “Tiştên ku tên bîra me, em wan dinivisînin. Ez û koma xwe. Heke dema vê stand-upê tije bû û lîstik ji me re bêje êdî bes e, hingê dixwazim stand-upeke din jî çekim. Lê xebatên min ên şanoyê jî didomin.”
