Partîya Têduştî û Demokrasî ya Şaran (DEM Partî), vera krîzê ekonomî û feqîrîye de seba girdkerdişê vengê adaletî, çar hetan ra ver bi Enqereye rayşîyayîşê ‘Budçeya Seba Nan û Aştîye’ da destpêkerdene.

Na çarçewe de Êlih de rayşîyayîş ame viraştene, Hemsereka Pêroyî ya DEM Partîye Tulay Hatîmogullari zî rayşîyayîş de ca girewt. Rayşîyayîş, Parka Yilmaz Guneyî destpê kerd.

Rayşîyayîş de Hemsereka Pêroyî ya DEM Partîye Tulay Hatimogullari qisey kerd û wina va: “Meclîs de nika pêvînayîşê butçeye domyeno. Ma do waştişê ciwan, cinî, feqîr û kedkaran biresnê Meclîsî rê. Ma seba nan û aştîye butçe wazenê. Çi heyf ke pêşnûmayanê ke ma pêşkêşê Meclîsî kerd, heme hetê AKP û MHP’î ra ameyê redkerdene. Îqtîdar çi heyf ke butçeya şerî pawiyeno.”

Baskê Herêma Egeyî

Eynî demî de baskê rayşîyayîşî yê Herêma Egeyî qezaya Selçukî ya Aydinî de dest pêkerd. Verê rayşîyayîşî, bi beşdarîya Verfeka Meclîsê Cinîyan a DEM Partîye Halîde Turkoglu, Wekîla Îzmîrî Îbrahîm Akin û rêxistina Aydinî kedkar ameyê zîyaretkerdene.

Rayşîyayîşê Tekîrdagî

Baskê rayşîyayîşî yê Herêma Marmarayî, qezaya Çerkezkoyî ya Tekîrdagî de destpê kerd. Xeylê kesî saetanê serê sibayî de ameyê pêser. Rayşîyayîş de Hemserekê Pêroyî yê DEM Partîye Tuncer Bakirhan qisey kerd û wina va: “Çi heyf ke lobîyanê faîz, sermaye û çekan rê bütçe est o. Ma demo ke behsê wendekaran kenê, vanê; butçe çin a. Faîz rê est o la wendakar rê çin o. Karker, teqawud nêeşkenê kîraya bidê. Keyeyî nêeşkenî lazimayanê domananê xo pêşwazî bikerê.”