Hemserekê pêroyî yê KESKî Mehmet Bozgeyîkî Bazarcixê Mereşî de derheqê rewşa qurbananê erdlerzî û hetkarîya dezgehanê dewlete de qisey kerd.

Hemserekê pêroyî yê KESKî Mehmet Bozgeyîkî, da zanayene ke dewlete mabênê şarî de cîyakerîye kena û wina vat: “Dewê ke elewî û kurd ê, înan rê hetê dewlete ra hetkarî nêerşawîyena yan zî zaf kêmî erşawîyena.”

Hemserekê pêroyî yê KESKî Mehmet Bozgeyîkî Bazarcixê Mereşî de derheqê halê ucayî de qisey kerd û vat, ‘‘Hema zî binê xirban de însanî est ê û qet mudahaleyêk zî nêameya kerdene. 80 saetî vîyartî, nas û merdimê înan paweyê mucîzeyêkî yê. Reyna Hatay, Meletî û Semsûr de zî ma eşkenê vajê ke dewlete nêeşkena mudaheleyê şarê xo bikera û nêverdana ke şar û rêxistinê sîvîlî zî hetkarî bikerê.

Bozgeyîkî wina dewam kerd: ‘‘Nika ra pey gere ma hem hetê weşîye ra hem zî hetê werd, hîjyen û setarbîyayîşî ra tedbîranê zaf başan bigîrê. Û ma vînenê ke Kizilay zî nê cayan ra nêaseno. Yanî ez seba Bazarcix, Îslahîye, Narli û Nûrdagi vana ke, mi yew xeyma Kizilayî zî nê cayan ra nêdîye. Têna şaredarîyî, cemxaneyî û sendîkayî tîya de est ê.”

Mîyanê şarî de cîyayîye yena viraştene

Bozgeyîkî îfade kerd ke mabênê şarî de cîyakerîye virazîyena û wina vat: “Bi kilmkî, bêtera girde est a. Wa sereyê şarê ma weş bo. Bi taybetî ma vînenê ke dewlete wexto ke xeym û hetkarîyan vila kena zî şarê xo sey yewbînî nêvînena. Bi taybetî Narli de ma şarê xo ra musayî ke zafê dewe serûbin bîya la xeym û hetkarîyê bînî wexto ke yenê vilakerdene mabênê şarî de cîyayîye danê viraştene. Dewê ke elewî û kurd ê, înan rê hetê dewlete ra hetkarî nêerşawîyena yan zî zaf kêmî erşawîyena.”

Herinda Halê Îstîsnayî de eşkîyayêne herêma afetî îlan bikerê

Bozgeyîkî derheqê Halê Îstîsnayî de wina qisey kerd: “Seke şima zî zanê Halo Îstîsnayî ame îlankerdene. Û dewlete ney zî bi nîyêtêkê xirabî xebitîyena. Medyaya sosyale qedexe kerde û sînorî dayî ronayene. Serê çapemenîye de tedayî est ê. Gere dewlete lez fek nê çîyan ra verda. Herinda OHALî de gere herêma afetî bêra îlankerdene.”