Mehemedê Şêxmîrî va ke her çiqas deyîrbazan tarîxê nuştekî çin bo zî, fekî de tim ganî mendê. Wexto ke radyo-TV çin bî, her şewe şarê kurd yew keye de kom bîyênê û deyîrbazan deyîr û estanekî vatênê. No sebeb ra yo ke ewro zî rewşa deyîrbazan ganî ya û şar erj dano goşdarîya înan.

Komela Dîcle Firat û Komela Deyîrbazan de her roj deyîrbazê erjîyayeyê kurdan bi deyîranê xo coş û heyecan danê şarê kurd. Şarê ke welatanê bînan û bajaran ra yenê Amed, mutleq seyr û zîyaretê Komela Deyîrbazan kenê. Nê deyîrbazê qedîmî, deyîranê sey Dewrêşê Ewdî, Mem û Zîn û Ewdalê Zeynike vanê.

Warê deyîrbazîya kirmanckî

Mehemedê Şêxmîrî ard ziwan ke warê deyîrbazîya kirmanckî de kemasî esta. Ey va “Çira deyîrê kirmanckî çin ê yan zî kêmî yê? Fekê ziwanê kirmanckî warê deyîran de tayê giran o. Govendan de kemasî çin a la warê deyîrbazî de esta. Ganî deyîrbaz û hunermendî lehçeya kirmanckî de zî deyîranê xo vajê.”

Ey va ke kirmanckî ziwanêko qedîm o û ganî wayîr bivejîyê û sey kurmanckî bêro şuxulnayîş. Mehemedê Şêxmîrî peynî de va “Ziwanê kirmanckî de çend deyîrê mi estê, la gama ke ez deyîranê kurmanckî açarnena kirmanckî tam cayê xo nêgênê. Şar ganî weş goşdarî bikero deyîrbazan, kilama deyîrbazan yena çi mana? Bi taybetî deyîrê kirmanckî lehçeyo qedîm o û rûmeta ma ya, ganî her wext deyîrbaz û hunermendî bidê şuxulnayîş û weş goşdarî bikerê.”