Amerîkayê der barê êrîşên dawî ên dewleta tirk li dijî bakur û rojhilatê Sûriyeyê daxuyaniyek da û Tirkiyeyê hişyar kir. Di daxuyaniyê de bal hatiye kişandin ser ewlekariya jiyana leşkerên amerîkî ên li herêmê û kampa malbatên DAIŞ’ê. Daxuyaniya Amerîkayê wiha ye: “Êrîşên asmanî yên vê dawiyê li Sûriyê rasterast ewlekariya karmendên Amerîkayê dixin nava xetereyê. Her wiha ev êrîş zirarê didin têkoşîna li dijî DAIŞ’ê û ewlekariya zêdetirî 10 hezar girtiyên DAIŞ’ê yên li kampa Holê tên girtin.”
Di berdewama daxuyaniyê de wiha tê gotin: “Rewşa berzbûyî pêşketinên bi salan li dijî çekdarên DAIŞ’ê dixe metirsiyê.”
Hêjayî gotinê ye ku di daxuyaniyê de dîsa behaneyên ku van êrîşan rewa dikin hatine destnîşankirin û wiha hatiye gotin: “Amerîka fikarên ewlekarî yên rewa yên Tirkiyeyê nas dike”, lê “ji bo ku balê bikişîne ser mîsyona têkbirina DAIŞ’ê û ewlehiya leşîkerên li ser erdê ku ji bo mîsyona têkbirina DAIŞ’ê ye, divê bi lez ev rageşî kêm bibe. “
Her wiha hêjayî bibîrxistinê ye ku doh balafirên dewleta tirk derdora kampa Holê ya girtiyên DAIŞ’ê topebaran kiribû û di encama tevliheviya ku vê êrîşê bi xwe re anîbû komeke çete ji kampê reviyane.
