Bi hevkariya Wêjegeh Amed, Kıraathane İstanbul Edebiyat Evi, Litteraturhuset Oslo ve Literarische Colloquium Berlin ji bajarên cuda ên dinyayê heşt nivîskar di çarçoveya projeya “Wêje Di Wêdeyên Sînoran de” ew ê beşdarî çalakîyan bibin. Di nava wan heşt nivîskaran de du nivîskarên kurd jî hene. Sîdar Jîr û Eyşana Beravî wekî nivîskarên kurd beşdar dibin. Çalakîyên destpêkê li Berlîn û Osloyê tên lidarxistin.
Di vê çarçoveyê de ligel Sîdar Jîr û Eyşana Beravî, ji Norwecê Kathrine Nedrejord û Simon Stranger, ji Elmanyayê Katja Lange-Müller û Dagmara Kraus û ji Stenbolê jî Ayhan Geçgin û Ebru Ojen beşdar dibin. Nivîskarên navborî yên ji welatên cuda ji bo projeyê bi temaya “Li Wêdeyî Malê” kurteçîrok nivîsandine û çîrokên wan dê bi 4 zimanan wekî pirtûk bi hev re werin çapkirin.
Her wiha di heman çarçoveyê de bername wê li Berlîn, Oslo, Stenbol û Amedê werin lidarxistin. Yek mebestên van rêzebername û çalakîyan jî ew e ku nivîskarên ji çand û welatên cuda bi têkilîya di ser nivîsê re hem çanda xwe, edebîyata xwe bi yên din bêhtir bidin nasîn û her wiha ji çandên cuda jî sûdê werbigirin.
Wêjegeh Amedê jî li ser hesabên xwe yên medyaya dijîtal diyar kiriye ku ew ê proje û çalakîyên bi vî rengî bidomînin.
Derheqê bernameyan de Sîdar Jîr axivî û ev tişt got: “Ji bo miletên din ew ê bêne çi wateyê nizanim. Lê ji bo me ew ê bibe tecrubeyek gelekî baş. Bi danûstandinên bi vî rengî edebiyata kurdî dikare kirasê lê hatiye fesilandin bi awayekî erênî biguherîne û wekî xwe ber bi dinyayê ve vepejile.”
Jîr anî ziman di pirtûka heşt nivîskaran hevpar amade kirine de çîrokek wî ya bi navê ‘Hejar’ û ya Eyşana Beravî ya bi navê ‘Çavê Paceyê’ jî cih digire û ew ê bi gelek zimanan werin çapkirin.
Sîdar Jîr anî zimên ku ew ê di meha Sibata 2022’an de li Berlînê, li Literarische Colloquium Berlin ligel 3 nivîskarên din dest bi bernameyan bike û Eyşana Beravî jî di heman demê de ew ê li Osloyê, li Litteraturhuset Oslo ye be.
Di vê serdana wan de ew ê bi gelek nivîskar û sazî û dezgehên miletên din re hevdîtinan jî bikin. Piştî demekê jî îcar ew ê li Osloyê, Stenbolê çalakî werin lidarxistin. Herî dawîn li Amedê, bi mazûvanîya Wêjegeh Amedê, ji wan welatan nivîskar dê werin û bername wê li Amedê jî werin lidarxistin.
