Vervatoxa Komîsyonê Huqûq û Heqanê Merdiman ê HDPyî Nuray Ozdogane dîyar kerd ke dosyaya dewaya Kobanê bi temamî sîyasî ya û bingeyê ci yo huqûqî çin o.

Vervatoxa Komîsyonê Huqûq û Heqanê Merdiman ê HDPyî Nuray Ozdogane û avûkatanê Dewaya Dafike ya Kobanê ra Cenk Yîgîter û Çîgdem Kozane merkezê HDPyî de derheqê dewa de kombîyayîşê çapemenîye kerd û prosesê dewa ercna.

Nuray Ozdogane pare kerd ke îqtîdar seba ke tira terseno pê bahane û zûran sîyasetmedaranê HDPyî tepişeno. Ozdogane vat: “Tehqîqatêkê na dewa yew twitî ser o dest pêkerd ke vera DAIŞî seba pawitişê cuya heqîye merdiman amebî nuştene. Dosyaya na dewa bi temamî sîyasî ya, yew bingeyê ci yo huqûqî çin o. Prosesê na dewa de heqê pawitişî betal beno, pawitişî pê wextê kilmî yenê astengkerdene, delîlî yenê viraştene, avûkatî binê gef û teda de yê. No huqûqê dişmenîye yo. ”

Avûkat Cenk Yîgîterî zî îfade kerd ke Dewaya Kumpasî ya Kobanê de huqûq yeno binpaykerdene û vat: “Na dewa dewaya qesasî ya. Seke Mehkemeya Heqanê Merdiman (MHME) vato vengdayîşê ke 6ê teşrîna verêne ya 2014î de HDPyî kerdbî mîyanê sînoranê îfadeyî de yê û mabênê nê vengdayîşî û serebûtanê şîdetî yê 7-8ê teşrîna verêne de yew eleqe çin o. La mehkemeya dewlete ney qebul nêkena û vana ke delîlê bînî, şahîdî estê.”

Avûkate Çîgdem Kozane vat: “Şahîdî beyananê zûran vanê. Beyanê înan yewbînan nêtepişenê û mehkeme kamyew beyanî biwaza ey gêna. Mehkeme bi nê hawayî kurdan, cinîyan, muxalîfan û mezgê HDPyî muhakeme kena. Ma venga avûkat, partîyanê sîyasîyan danê ke roniştişanê dewa teqîb bikerê.”