Rayber Abdullah Ocalan badê tecrîdê Îmrali yê 27 serra ra dima nika bi hişmendî û bawerîyêka xurte, wazeno bi sîyaset û bi ray û raybazanê neweyan Tirkîya de pergalêkê demokratîkî awan bikero û mafê civata kurde mîsoger bikero.

Cayo ke zext û zordarî bibo, şert û mercê sîyasetê azad û qalkerdişê civakan çinêbo, ewca de çekî kunê dewre. 42 serrî yo kurdî qabê pawitişê estbîyayîşê xo çek bikarenê. Rayber Apo vano çiyo ke ma waşt bi çek bidestbifînê ma heme bidestfînay. Ma estbîyayîşê civata kurde bi dagirkeran û heme dinya da qebûlkerdiş. Nika dora azadî ya. Dore awankerdişê civata demokratîk o.

PKK 42 serrî vera dewleta tirke de şero çekdar o ke zaf xidar kerd. Di encamê nê şerê xidarî de dewleta tirke û nîjadperestê tirkan neçar mendî estbîyayîşê kurdan qebul bikerê. Nika proseso ke Rayber Apoyî do destpêkerdiş qabê dewleta tirke û nîjadperestanê tirkan derfetêko zaf ercya yo. Heke nê derfetî baş nêbikarnenê, do bedelê cêy zaf giran bo.

Rayber Apo 52 serran verê joy vat Kurdîstan mêtîngeh o, dewleta tirke mêtînger a. Dewleta ku şima tera vanê Tirkîya Kurdîstan o û bi hezaran serrî yo welatê kurdan o. Rayber Apoyî bi xoverdayîşê xo yê 52 serran na heqîqeta xo bi dewleta tirke û heme dewletanê Rojhelatê Mîyanênî û dinya de da qebulkerdiş.

Reftarê Dewlet Bahçelî

Rayber Apoyî bi xoverdayîşê xo yê 52 serran bê tawîz bi heme şarê tirkî, roşinvîr, aqilmend, nîjadperestanê tirkan da qebûlkerdiş ku şaro kurd est o û Kurdîstan welatê înan o. Nîşaneyê înan zî Dewlet Bahçelî bi xo yo. Dewlet Bahçelîyo ke serkêş û vîrmendê tirkîzmî yo badê xoverdayîşê 52 serran neçar mend heqîqeta civata kurde û Kurdîstanî qebul bikero. Bahçelî yo ke heta vizêrî vatêne kurdî çin yê û Kurdîstan welatê tirkan o emro hewar keno û vano badê Îranî dore yena Tirkîya, qabê ke Tirkîya nêricyo û parçe nêbo hewco ma dostanî û biratiya kurd û tirkan xurt bikerê.

Rayber Apo û Tirkîya

Rayber Apo heskerdê merdimî û civatan o. Emrê xo di raya xoverdayîşê heq, hiqûq, edalet û pawitoxîya civatan de derbas kerdo. Keso ke emrê xo di raya awankerdişê paradîgmaya xelasîya merdimahî de derbas bikero, bêguman qabê civatan çi baş bo do êy bikero. Rayber Apo nêwazeno Enqere û Stenbol bi aqûbetê Bexdad, Şam û Tahranî dir rîbirî bimanê. Nêwazeno şarê Tirkîya bi sosret û bobelatan ra rîbirî bimano û malwêran bibo. Nêwazeno şarê Tirkîya koçber û perîşan bibo.

Civata demokratîke

Rayber Apo 27 serrî yo di hucreya xo ya yew kesî de ser çareserîya persgirêya kurde de xebetyeno. Yewîn xayê êy de do seyin civata kurde fina heme civatan mafê xo bigero û azad bicuyo, do seyin Tirkîya de civata demokratîke awan bibo û heme civatê Tirkîya di çarcoveyê civata azad de azad, aşt û aram bicuyê est a. Belê 27 serrî yo qabê awankerdişê azadî, aştî û aramîya civakan xebetyeno.

Azadîya civatan

Loma Rayber Apoyî demildest cevab da waşteka aştîya Dewlet Bahçelî. Rayber Apo wazeno di beyntarê kurd û tirkan û heme şaranê Tirkîya de aştî pêk biyaro. Pêk amyayê na aştî ke di awankerdişê civata demokratîke de vîneno. Loma zaf muhîmî dano paradîgmaya xo ya ‘Aştî û Civata Demokratîke’. Çareserîya heme persgirêkan û azadîya heme civatan bi awankerdişê civata demokratîke çareser benê. Do civata demokratîke de heme şarî bi rengê xo, bi çandê xo bieşkê mîyanê aştî û aramî de bicuyê. Bêguman xelasîya Tirkîya di serkewtişê na paradîgmaya Rayber Apo de ya.

Rojhelat û Rojawanê Kurdîstanî

Çareserîya pergirêya kurd a Tirkîya bêguman do bandor ro Rojhelat û Rojawanê Kurdîstanî ke bikero. Kurdîstan se serran verî bi peymana Lozanî mîyanê çar dewletan de bi çar parçeyî, nika hewcedarî bi dîzaynkerdişê nê çar dewletan est a. Loma her ku prosesê Aştî û Civata Demokratîk a Rêber Apoyî aver şêro do bandor ro nê çar dewletan û heme Rojhelatê Mîyanênî bikero. Do desthilatdarîya Îranî ya faşîst û desthilatdarîya çeteyanê Şamî ke fina Tirkîya neçar bimanê, kurdan muxatab bigerê û ro ray û raybazanê werêamyayîşî bigeyrê.

Badê Şerê Cîhanî yê Yewinî dîzayno ke bi peymans Lozanî virazya, herî zêde kurdî mexdûr kerdî. Se serrî yo kurdî çarmix de yê û gunî laşe înan ra herekyena. Nika Rojhelatê Mîyanênî de dîzaynêko newe virazyeno. Heke kurdî yewbîniya xo ya neteweyî awan bikerê û paradîgmaya Rayber Abdullah Ocalanî esas bigerê, do bieşkê dîzaynê neweyî de cayê xo bigerê, azad, serberz û bextewar bicuyê.

Nika ra herêma Rojawanî mîyanê tarîtîya Rojhelatê Mîyanênî de fina estarî biroqyena û rayê azadî, aştî û aramî nîşanê heme şaranê Rojhelatê Mîyanênî dana. Heke paradîgmaya Rayber Apoyî biser bikewo do Kurdîstan fina estarê şeveqî şewqê xo bido cîhanî.

Belê, Rayber Apo wazeno biratîya kurd û tirkan xurt û qayim bikero. Heke rayedarê dewleta tirk û çapemenîya xo raşt xurtbîyayîşê biratîya kurd û tirkan wazenê ewilî gere têgeha ‘terorî’ fekê xo ra vecê û dirûşmeyanê faşîzanan ra fek veradê. Persgirêya kurd înan veta kurdan nêveta. Heke înan estbîyayîşê kurdan înkar nêkerdê û kurdî qetil nêkerdê do nika na persgirêya kurd qet çinêbê.