Hemsereka DADî Kadrîye Dogane Jenosîdê Dêrsimî de nêzdîbîyayîşê dewleta tirkan rexne kerd û wina vat: “Cayê goranê bi hezaran merdiman nêameyî eşkerakerdene. Qarê kiştişê komkîyî û goranê komkîyan est ê.”

Dogane ard ziwan ke 86 serran ra dima hema zî xîret yeno kerdene ke Terteleyê Dêrsimî bêro vîrakerdene û vat: “Cayê goranê bi hezaran merdiman nêameyî eşkerakerdene. Qarê kiştişê komkîyî û goranê komkîyan est ê. Bi serran o ma wazenê ke cayê goran eşkera bibê. Dewlete ney red kena û vana ‘ma kerd û binerd kerd.’ Safhaya ney a diyîne zî vîrakerdiş o. Wa cayê sey Çemê Kutu, Çemê Laçî de wa cayê yadkerdişî bêrê îlankerdene. Seba ke hesab bêro persayene ganî hiş û vîr bêrê pawitene. Waranê qirkerdişî de festîval û konserî yenê kerdene. Ganî hol bêro zanayene ke nê xizmetê çita kenê. Hema zî nê terteleyî de têrîameyîş nêqewimîya.”

Kadrîye Dogane îfade kerd ke Dêrsim seba bawerîya elewîyan merkezêko girîng o û armancanê terteleyî ra yew zî çinkerdişê bawerîya elewîyan bîbî û wina dewam kerd: “Ganî cayê hiş û bawerîye heta peynî bipawîyê. Seba caardişê nê pêroyînan zî ganî Dêrsim weçînayîşanê herêmîyan de ê kesanê ke temsîlîya înan bikerê, biweçîno. Ma wina pawenê û naye ser o bixebitê.”