Çalakiya Nobeta Edaletê ya Emîne Şanyaşarê ya ku li navçeya Pirsusa Rihayê hevjîn û du kurên wê ji hêla parastvan û xizmên Parlamenterê AKP’ê yê berê Îbrahîm Halîl Yildiz ve hatine qetilkirin û kurekî wê hatiye girtin, di roja 29’emîn de li Meclisê dom kir.
Dayik Şenyaşar û kurê wê yê Parlamenterê DEM Partiyê Ferît Şenyaşar têkildarî çalakiya xwe li Meclisê daxuyaniya çapemeniyê li dar xistin. Şenyaşaran piştre xwestin derbasî avahiyê ku Koma DEM Partiyê lê ye bibin. Polîsên li Meclisê peywirdar bûn, Şenyaşaran asteng kirin. Polîsan anîn ziman ku ji bo Şenyaşar derbasî meclisê nebe biryar hatiye dayîn û ew ê ji ber vê yekê destûrê nadin. Polîsan negot bê ka ew biryar ya kê ye.
Emîne Şenyaşar rakirin nexweşxaneyê
Piştî astengkirina Emîne Şenyaşar a ku nexweşiya dil pê re heye, rewşa wê xirab bû û ew rakirin nexweşxaneyê.
‘Bila tevahiya Tirkiyeyê bibîne’
Dayik Şenyaşar li cihê turnîkeyan rûnişt û bertek nîşanî rewşê da. Ferît Şenyaşar jî der barê mijarê de wiha axivî: “Ez wek parlamenterekî gel hilbijartiye dixwazim biçim koma xwe, lê belê em tên astengkirin. Li vê derê fermanên keyfî tên dayîn. Nabêjin bê ka ji kê fermanê girtine. Fermana hatiye dayîn, derveyî qanûnê ye. Bila tevahiya Tirkiyeyê û hemû cîhan bibîne, li vê derê çi tê jiyîn bila were dîtin.”
Şenyaşaran çalakiya xwe li cihê ku hatine astengkirin, bi rûniştinê domandin.
