Di 27’ê sibata 2020’an de li Girava Îmraliyê ku Rêberê PKK’ê Abdullah Ocalan lê girtî ye agir bi daristanê ketibû. Walîtiya Bûrsayê têkildarî şewatê daxuyanî da û angaşt kir ku şewat ji ber çirûskên têlên ceryanê derketiye. Piştî agahiyan parêzer û malbat ji bo hevdîtinê bikin serî li Serdozgeriya Bûrsayê da. Ji ber bertek, çalakî û daxuyaniyan 2’yê adarê malbat çûn Îmraliyê û hevdîtin kirin.
Piştî 8 mehan malbatên Rêberê PKK’ê Abdullah Ocalan, Omer Hayrî Konar û Veysel Aktaş çûn Îmraliyê hevdîtin pêk anîn. Ji ber ku serdêrê/a Hamîlî Yildirim nexweş bû, nekarî hevdîtinê bike. Mehmet Ocalan bi birayê xwe Abdullah Ocalan re hevdîtin kir.
Rêberê PKK’ê Abdullah Ocalan di hevdîtina bi Mehmet Ocalan re wiha got: “Ez bawer im HDP’ê kongreya xwe li dar xist. Ger li herêmê hûn nebin hêz, binêrin li Tirkiyeyê meseyeke dupê heye. Di nav tevgera we de tevgerên çepgir jî hene. Bi giranî jî kurd hene. Gelên din jî hene. Divê hûn jî bibin piyek. Hûn ê li wê bibin hêz. Ger ku meseyeke sêpê be nakeve. Meseya dupê pergal çiqas ji bo neketina wê hewl bide jî wê bikeve. Ji ber wê hewldana me ew e ku kurd bibin piyê sêyemîn. Ji bo bibin piyê sêyemîn mezinbûn divê. Her tişt bi têkoşînê, bi têkoşîna rast dibe.”
Ocalan, di hevdîtinê de careke din li ser rêbaza çareseriyê sekinî û wiha axivî: “Hûn neçar in bibin hêz ku hûn dikaribin van pirsgirêkan çareser bikin. Rojhilata Navîn û em nav lê bikin pirsgirêka kurd bi vî rengî dikarî çareser bikî. Heke tu nebî hêz dê kes pirsgirêkê çareser neke. Em dibêjin mese, mese dupê ye. Hûn neçar in bibin piyê sêyemîn ê meseyê. Ev bi çi dibe? Bi hêzê dibe. Heke vêya bikin dê bibe. Heke hûn ked bidin dê bibe. Belê mese pêwîst e. Ev jî dê bi ked û xizmet ji bo gel bibe.”
Abdullah Ocalan di hevdîtinê de mijara Rojava û Sûriyeyê jî nirxand: “Li Rojava gelek eşîrên ereb hene. Kesên li Rojava ked didin gelek bi nirx in. Ji ber xebata wan ez wan pîroz dikim. Xebateke pîroz dimeşînin. Serkeftinê ji wan re dixwazim. Tirkiye geh bi Amerîkayê geh jî bi Rûsyayê re ye. Ev ne çareserî ye. Çareserî ev e; divê hêzên li Rojava, di nav yekparebûna Sûriyeyê de bi awayekî hîn berfirehtir bibin hêz. Ev ji bo parastina yekparebûna Sûriyeyê pêwîst e. Rexistibûna li Rojava ji bo yekparebûna Sûriyeyê ye. Rêxistinbûnên li wir; kurd ereb, ermen û xiristiyan heke nebin hêz dê sibê nikaribin yekparebûna Sûriyeyê jî pêk bînin. Stratejiya li Rojava gelek rast e, silav û rêzên min bêyî cudatî bigihînin hemû kesên ku li wir dixebitin û ked didin.” STENBOL
