Ez vana tarîxê Kurdan de prosesê ewroyî ra hîna giran, hîna zehmet yew proses derbaz nêbîyo.

Çunke qet yew wext de Kurdî hende wayîrê hêzî nêbîyê û hende zî yewbînan rê didanî nêqirişnayê. Mabênê hende dişmenan de yewbînî xirab nêmusnayê.

Kurdan Başur de yew statuyo muhîm girewto xo dest û no destkewtiş hetê yewîya netewbîyayîşî ra zaf muhîm o.

Kurdan Rojava de bi ked û erjeyanê pîlan mucadeleyo muhîm dayo, destkewtişê muhîmî girewtê xo dest û nê destkewtişî zî hetê netewbîyayîşî ra bêemsal ê.

Kurdan Bakur de bi serran o mucadeleyê xo kerdo berz û no mucadele ewro nêzdîyê netîce girewtêne yo.

Başur de rewşa KDP û Şengalî malumê her kesî ya. Şengal seba ke destê Êzîdîyan de nêmano û seba ke Êzîdîyî îdareyê xo menê ro û hetê asayîş û pawitişî ra xo nêpawê, hukmatê Başur ê Kurdistanî Şengal û Êzîdîyî dayî destê Iraqî. Yanê Kurdê Êzîdîyî yan binê kontrolê mi de manenê, yan zî binê kontrolê Ereban de.  Êzîdîyî bawerîya xo bi KDP nêanê. No sebeb ra zî KDP va şima ya benê tabîyê mi yan zî ez şima dana destê Ereban. Tabî no hesab ê Tirkîya yo. Çunke Tirkîya nêwazena PKK uca de ca bigîro.

Rojava de mucadele hîna zî dewam keno û seba ke Surîye de zî Kurdan rê yew statuyo mende bêro ronayene xoverdayîş dewam keno. La baş êno zanayene ke uca de zî KDP (bi destê ENKS) û Tirkîya pîya hereket kenê.

Reyna her hetê Başurê Kurdistanî de nuqteyê leşkerî yê Tirkîya ameyê ronayene û Tirkîya û KDP pîya vera PKKyî mucadele kenê. Merdim vano qey Bakur de mabênê Kurdan û Tirkîya zaf baş o û PKK Kurdan rê dişmenîye keno. La Bakur de vera îqtîdarê kolonyalîstî mucadele hîna zî bêmabên dewam keno û Kurdê bakurî her roj raştê zulm û zordarîye ênê, her roj ênê kiştene û îqtîdar ney eşkera, verê çimanê pêroyê dinyaye de keno.

Rewşa winasîye de yewîya netewbîyayîşê Kurdan ra êna qalkerdene. Birakujîye (yewbînîkiştişê Kurdan) rê lanetî ênê wendene. Helbet ganî lanet bêro wendene. Hezar dolime lanet bêro o keso ke waûbirayê xo rê dest keno berz, tifang dergê ci keno rê.

Merdim ke tarîxê mucadeleyanê Kurdan de nîyadano eşkeno vajo yewbînî ra dûrî bîyê, têkilîye nêeşkîya binê ro, yewbînî ra xebera xo çin bîya, seba ke coxrafyaya hîraye de bîyê, nêeşkîyo xo biresnê yewbînî. La ewro… Ewro pêro hêzê Kurdan zaf nêzdîyê yewînî yê û eke biwazê eynî roje de eşkenê têkilîye binê ro û seba şarê Kurdî eşkenê bêrê têhet. La problem esto. No problem problemê Kurdan bi xo nîyo. Problemê Tirkîya, Iraq, Îran û Surîye yo. Nê kolonyalîstî bîyê yew û nêwazenê mabênê Kurdan de yewîye bêro ronayene. Karê xo yê qilêrinî zî bi destê Kurdan vînenê û kenê ke Kurdan bi Kurda bidê qirkerdene.

Bi nê halî qet yew parçeyê Kurdistanî de, rewşa qet kesî garantî nîya. Şengal de veng û hêzê Êzîdîyan ke bêro birnayene, kara xo nêresena Erbîl û Duhokî. Başur de destê KDP û YNKyî ke bêro şikitene, PKK nêbeno wayîrê hêzî. PKK ke mabên ra bêro wedarnayene, qet yew hêzê Kurdistanî rê parçeyê ca nêmaneno.

Ganî na baş bêro fam kerdene: Kurdî ewro her wextî ra hîna zêde azadîye ra bîyê nêzdî û tarîxê verî ra nat şarê Kurdî seba naye canê xo, malê xo dayo û no mîras mîrasê şarê Kurdî yo. Ê yew keyeyî, yew eşîre, yew hukmat û yew rayîrberî nîyê nê destkewtişî. Heqa qet yew Kurdî çin a ke nê destkewtişanê bi seyan serran bikero xirabe û şarê Kurdî goreyê hereman, goreyê keyeyan, goreyê eşîran û goreyê partîyan bikero cîya û bierzo dişmenanê Kurdan ver.

Azadîya Kurdan bi yewbîyayena Kurdan mumkîn a. Yewîye ke nêro ronayene, dişmenê Kurdan erdê Kurdan de hîna zaaf zaf zêde Kurdan do bikişê.

Ganî ma xo vîra mekîme: Dişmen dişmenê Kurdan o, dişmenê filan partîye û bêvan kesî nîyo. Dişemenê Kurdî nêbeno dostê filan partîya Kurdan û bêvan rayîrberê Kurdî.

Dişmen tena Bakur de nê, Başur de zî, Rojava de zî eynî dişmen o. Ma referandumê Başurê Kurdistanî de no eşkera dî.

Bêrê polîtîkayanê qilêrinan ê Tirkîya, Iraq, Îran û Surîye ra dûrî, bi nameyê şarê xo, bi axa şehîd û erjeyanê Kurdistanî destê xo binîme wîjdanê xo ser û seba her ferdê Kurdî, seba her bostê erdê Kurdistanî  pîya mucadeleyê xo bikîme berz.

Çunke ewro kurdî her parçeyê Kurdistanî de payan ser o yê û wayîrê ferasetê neteweyî yê. Yewbîyayîyê ma bena azadîye.