Dagirkerdoxê welatê ma gama ke galeyê leteyêkê Kurdîstanî kenê hertim xorê binêk hêz û hetanê kurdan kenê mana. Dagirkerdoxî bi nê manayan hem galeyanê xo meşru kenê û hem zî mabênê hetanê kurdîyan xerab kenê.
Çi heyfo ke mîyanê ma kurdan de biney kes û het bi nê manayanê dagirkerdoxan yê zurekeran ra bawer kenê û estbîyayîşê hêzanê kurdîyan berpirsiyarê galeyanê dagirkerdoxan vînenê. Yanê ê zî seke dagirkerdoxan hêzanê kurdîyan sucdar kenê û vanê eke şima îta de nêbîyêne înan (dagirkerdox) galeyê ma nêkerdêne. Raşta ci nê sucdarkerdişî benê sedem ke mabênê hetanê kurdîyan de perse virazîyayo û kurdan yewbînan ra dûr bifîno.
Dinya de çi şoreşê ke vera dagirkerdoxan de ameyê kerdiş bêqisur nîyê, çimkî îmkanê şoreşgeran hertim yê dagirkerdoxan ra kêmî yê, xora şoreşger zî seba derfetê ci destê înan ra ameyê girewtiş verba dagirkerdoxan de cehd kenê û xover danê. Semedo ke dişmenê ma kurdan, dişmenêko zaf xedar o şarê ma yê kurdî destê înan rê zaf zilm dîyo. Şoreşgerê ma yê kurdî zî seba ke şar û welatê ma binê zilmê dişmenan de bixilasnê bi serrano heme bêîmkanîyan reyde verba zilmê dagirkerdoxan de xover danê. La biney kes û het herinda ke nê zehmetîyan bivînê de cehdo ke verba dagirkerdoxan de yeno kerdiş sucdar kenê û vanê şima benê sedemê bêaramîya Kurdîstanî. Raşta ci enê vatişî wina tenya xizmetê armancanê dagirkerdoxanê Kurdîstanî kenê, çimkî verê awankerdişê hêz û rêxistinan zî nê dewletan Kurdîstan de bi se henzaran kurdî kiştê, surgun kerdê, daliqnayê û eştê hepis. Dewleta Tirkîya Dêrsim de, Botan de, Geliyê Zîlan de, Agirî de, Amed de, Xerzan de, Qoçgirî de û hîna zaf cayanê binîyanê Kurdîstanî de tertele û qirkerdişê zaf pîlî ardê serê şarê ma yê kurdî, gelo eke semedê galeyan nika rêxistin a, ena ray yê aye wextê kam bî? Senî ke dewlete nika semedê galeyanê xo rêxistine keno mana, o çax zî dewlete reyna seke nika kurd û rayberê înan yê seke Şêx Seîd, Seyît Riza, Alişêr, Îhsan Nurî Paşa û yê binî sucdar kerdbî.
Dewleta Tirkîya teyna hetê eskerî de galeyê kurdan nêkena, heman wext de heme kurdê ke ziwan, kultur û tarîxê xo rê wayîr vejîyenê raştê galeyanê Dewleta Tirkîya yenê. Heta nika bi des henzaran xebatkar, wendox, citkar û kurdê sîvîlî wayîrê dewaya (ziwan, welat, kultur, tarîx, huner, nasname ûsn.) xo vejîyayê, bi îdîaya endambîyayîşê rêxistine hetê dewlete ra ameybî desteserkerdiş û tepiştiş. Tewr peynî de Verfekê Platformê Ciwananê Xoseran Ferît Azad seba ke bi alaya Kurdîstanî beşdarê roşanê neteweyî (Newroze) bîyo ame tepiştiş. Reyna verê cû zaf reyî mamoste û ziwanzanî semedê xebatanê xo yê kurdîyan bi îdîaya endambîyayîşê rêxistine amebî tepiştiş. Seke ma pêro zî zanenê ne berzkerdişê alaya Kurdîstanî suc o û ne zî pawitiş û bonderkerdiş/musnayîşê ziwanê kurdî suc o, la dewlete rêxistine tenya xo ra kena maske û heme kurdanê welatperweran bi no qayde ceza kena. Armanc û meqsedê dewlete zaf zelal o, la kurdê ma herinda ke nê helwestanê dewlete yê dişmenaneyan bivînê yewbînan rexne û sucdar kenê. Raşta wa ewro dişmenê ma semedê kerdişanê xo rêxistine mojnenê la nêbeno ma zî bi ziwanê înan yewbînan sucdar bikerê, çimkî peynî de seba felatîya ney welatî (Kurdîstan) şar do ma mecbûr bikero ke ma bêrê têhet. Aye semed ra zî ganî ma hay û vatişanê xo est bê, seba ke ma meştî bieşkê biewnê rîyê yewbînan.
Sadamî 37 serran verê cû bi çekanê kîmyewîyan galeyê Helebceyî kerd û bi henzaran kurdî kiştî. Badê Jenosîdê Helebceyî Sadamî vat ke pêşmerge û şarê kurdî paştîye daye pasdaranê Îranî û înan reyde xebitîyayê, yanê Sadamî zî sey dagirkerdoxanê ma yê nikayênan reyna şar û hêzê kurdî sucdar kerdbî, xora ganî ma baş bizanê ke dagirkerdoxî çi rey xo sucdar nêkenê û nêvînenê.
Dewleta Tirkîya zî ena serranê peyênan de her kes û hetê kurdî yê ke ci ra bîat nêkenê bi îdîaya rêxistine keno armanc û galeyê ci keno, desteser keno, erzeno hepis, yanê rêxistine mana ya, armanc xelisnayîşê dewaya kurdî yo.
Ena ray ganî kes û hetê kurdî çimê xo baş akerê û dost û dişmenê xo baş nas bikerê. Êyê ke semedê galeyanê xo rêxistine keno mana û birr, ax, hard, newalanê Kurdîstanî bomba kenê zî yew ê û reyna êyê ke bi heman mana sîyasetkar, mamoste, ziwanzan, şanoger, wendekar, rocnamewan, cinî, mêrdek û ciwananê kurdan desteser kenê û tepişenê zî yew ê. Yanê dişmenê ma yew o, coka hewce nêkeno ma yewbînan sucdar bikerê û şerê yewbînan bikerê.
