Herçiqas ke des serrî na qetlîyam sero ra raverdî, hona jê roza virene dezê xo giran o.
Hona newe vore esta hardî, tayê cayî belekinî. Siliyê hard kerdo hît, binê siliyê-sepeliye de, werte lîmede mendî. Her jû hetî ra vengî mayan, vengî dayikan asmen keno lete. Ostorî barkerde yenê, bare de giran sero. Barê xo bara kurdan a. Merdene… Bi teyareyan dewizi ameyî qetilkerdene, ebi ostorona anê meyitan. Kam kî dimene Roboskî dî besenê kerd xo vîra bikero.

Tariye de henen niştra koyan ser, senik mend bî asmen cora biqurfiyo. Tariye de henen ameyî bi Roboskî ser, bêvengiya, neçariya henene bi ke teyariye domananê Roboskî kerd bî lete bi lete.

Hard û asmen a roze xo ra serm kerdî, hama dewleta tirkî nê serm kerd, nê kî bi na qetlîyama mend. Kurdî ke welatê xo canêverdayî, kurdî ke zonê xo rê, kamiya xo rê wayir vejiyayî, kurdî ke sîsteme rê teslîm nêbîyî, hona yenê qetilkerdene. Hona bara kurdan merdena. Roboskî de bi teyareyan, zîndanan de bi rayanê ciya ciyan kurdî yenê kistene.
Roboskî de 28’ê kanûna 2011î de 34 kurdî hetê teyareyanê lejî yê dewleta tirkî ra ameyî qetilkerdene. Domanî, gencî pêro piya 34 mordemî ke serva debara xo welatê xo de jû het ra şiyê hetî bînî, raya pêyser ameyene de ameyî qetilkerdene. Jû çixir ra têdima rayî de bî. Barê xo est bî. Serva debara xo, serva malbata xo kewt bî rayî. Raya kes nêbiye, raya welatê xo de, raya de dergî guretî. Hama dewleta ke welat kerda lete, raya yênan bi guleyan, bombeyan gurete.

Hetê dewlete ra bara kurdan hertim biya merdene, kistene, qetlîyam. Dewlete, îktîdar hertim serva faşîzmê xo gurena, mavene gereyîşî de ra. Raştiya na faşîzmî de zîhniyetê yew ziwan, yew milet estoa. No faşîzmî Mereş de, Roboskî de, Cizir de û zaf cayanê bînan de bi qetlîyaman eskera biyê. Rengê xo ra qeyir, renge de bîn rê haqa ciwiyayîş, haqa xo ziwan ardene nêdana.

Ramitoxê no faşîzmî yê 20 serranê pêyenan hukmatê AKP-MHPyî polîtîkayanê xo, ser qedinayena kurdan ra dana ramitene. Coka her ca de honde herîş keno. Pêro polîtîkayê qirkerdene çokan ser ardena kurdanî. Kurdî ke dawa azadîye danî ramitene, azadîya xo wazenî, nayê ser jû game pêyser nêerzenî, ya kisenê ya kî erzenê zîndanan. Kurdî, şoreşgerî zîndanan rind zonenî, nejdî ra naskenî. Her waxt zîndanan de zilm û herîşî faşîzmî biye, dustê nayî de ke xoverdayîş, tekoşîn û vera teslîmîyet qerarîya fikranê xo rê wayir vejiyayene biya. Hama ewro îktîdar zîndanan de na polîtîka jedena kerda xorî. Hucreyan de tepîşteyan poynenî. Vanê; sima teber de est xo ver, hama zîndanan de ma sima teslîm cemê. Seweta nayî ke tepîşteyan rê zor kenê ke polîtîkayanê yênan qebul bikerî. Werte çar dêsan de, werdene ra heta weşîye her zilm tepişteyan ser danê ramitene. Xoverdayena de pîlî dûste na faşîzmî de esta. Gune teberde na rind bêro famkerdene, iyê ke teber de rê bibê vengê tepişteyan, dûstê na zilm û zorvajiye de bêveng mevinde. Her kes vengê xo berz bikero, vejîyo kuçeyan û onca nûmayisanê malbatanê tepîşteyan rê wayir bivejiyo. Niya, bi qûweta de pîla virniya na zilm cerîna.

Gunê ewro zîndanan rê wayir bêro vejiyayene ke qetlîyame pîlî mere ciwiyayîs. Her waxt xoverdayoxe serkewtî, zorvajî-zulumkarî kerdî vîndi. Rew-herey qetilkaran ra hesab ame perskerdene. Namê yênan tarîx de hertim bi xiravîya ame nûsnayene.
Bêveng vinetene teyna merdena tepişteyan nê, merdena ma wa, merdena wastena azadîya şarê kurdîya. Waxto de heneno ke bêveng vinetene nêbena. Rejîmê AKP-MHPyî ra, no sîstemî ra gunê hesabê qetlîyamê Roboskî bêro perskerdene. Hesabê gonîya domanan bero perskerdene, hesabê wes bi wes mordeman vesnayene bêro perskerdene. Raya azadîye de tekoşîn dayene, xover estene, peyser game nêestene, serva pêro qom azadîye, ciwiyayîsi têdust ana. Eke ewro biyayîsanê zîndanan rê bêveng ame vinitis, meste-borê jedena herîşî yenê ciwiyayene. Însonê ke kerde are, estê hepis yênan sero, serva hukumdarîya xo zilmêk pîl dîyeno ramitene. Teber de ya kî zerê de virnîya faşîzmî ke nêame guretene, adirê xo resono her ca. Coka na adir ra xo seveknayene ke bêvengîye şikitene ra verena.
Zîhniyetê no dewlete, no îktîdarî Roboskî de zelal werte de ro. Herçiqas ke des serrî na qetlîyam sero ra raverdî, hona ke jê roza virene dezê xo giran o. No dez bibo qûweta qetilkerdoxan ra hesab perskerdene…