Nê rojê ke ma tira ravêrney bi her hawayî semedê merdiman û merdimatîye zaf muhîm ê. Wa kesêk nêvajo halê dinya mi rê çiçî! Wa heme kesî bizanê ke, keştîyêke de boya cesedekî ra do heme kesî nêweş bikûrê. Çiyo muhîm oyo ke zalimê dinya şer vejenê. Feqirî zî mirenê. Misabakaya şerî de qetî gol çin o, topa ke gineno dinya sero de cayê DYA’yî roj bi roj teng beno û zalim wazeno ke Mezopotamya de bica bibero. Qezençkerdişê şerî qetî çin o.
Ewro şero ke dinya de berî ra bi hawayo serdin, dewam kerd. Ney rojanê peynîyan de resayo astêka germine. Koordînatorê şerî Îngilîstan, senarîst DYA, kaykerdox Îsraîl o. Nê dewletî ewro semedo ke amûranê çekan û sanayîya xo biroşê û qezenç bikerê, bi serrano ke parzemînê Afrîka, Asya û ca bi ca dewletan sero polîtîkaya gunîmijyayîşî dayo şopnayîş û hewna zî wazenê biramnê. La ameyîş de zalim zano ke awka deryayî berz bena û tofanîyî do zaf bibê û do sifte Amerîka binê awe de bimano.
Awanbîyayîşê Kurdîstanî
Wa kêfa kurdan zaf nêro, nêvajê ke DYA û Îsraîl do Kurdîstanî awan bikero? Yew raştîye est a, o zî Kurdîstan awan bo, bi destê kurdan awan bo. Bi destê qetilkaran û qunîleyoxan awan nêbeno. Ma ferz bikerê ke awan bo. Wa heme kurdî bizanê ke awankerdişêkê bi destê zaliman serranê ma vero do bibo xirabkerdişê Kurdîstanêkê boykewteyî. Nê semedî ra bi her hawayî Kurdîstano ke bu lep û mezgê kurdan awan bîyo, encax payan sero vindero.
Wa heme zalimî bizanê ke kurdî şerwanê herî başî yê dinya yê, pîyonê xelaskerdoxê dinya nîyî. Ewro teknolojî serdest aseno, la ameyîş de do mezgê merdiman xirabe bikero.
Tesîrê Şerê Îran û Îsraîlî
Şero ke Îran, Îsraîl û DYA ewro rayîr ra benê, do sifte çar parçeyanê Kurdîstanî û pey de zî zaf cayanê dinya bivêşno. Wa heme kurdî bizanê ke no şer semedo ke Kurdîstanî awan bikerê, nîyo. No şer semedo ke zalimî Amerîka ra bêrê Mezopotamya û bica berê yo. Çimkî waxtê înan zaf tay mendo. Eke awa deryayî nîm metroyî berz bibo, sifte Amerîka do binê awe de bimano. Peyra Ewropa, cayê bînî û herî peynî Mezopotamya do bimano. Na mijarêka zaf muhîm û xorî ya.
Eke kurdî goreyê berzbîyayîşê awe polîtîka bivirazê û xo rayîr ra berê, paştîya înan do nêro erd.
