Rojnameyê The Washington Times de bi destê Jed Babbînî meqaleyêke nusîyaye. Babbîn vano ke Erdogan erdlerzê 1999î ra dima hêzdar bî û ame îqtîdar, nika zî pê erdlerzanê Mereşî eşkeno îqtîdarê xo vîndî bikero.
‘Erdogan dîktator o’
Jed Babbîn nuşteyê xo yê balkêşî de xeylê hetanê hukmatê Erdoganî rexne keno. Verî stîlê îdarekerdişê Erdoganî ercneno. O vano ke Erdogan “otokrat” nîyo, eksê ci “dîktator” o. Yanî çekuya “otokrat”, seba pênaskerdişê Erdoganî qîm nêkena û polîtîkaya ey a zordeste sivik kena.
‘Demokrasî tramwayêk a’
Yeno zanayene ke Erdoganî serranê 1990an de vatbî ke “Demokrasî maneno tramwaye. Şima esparê ey benê, gama ke resenê cayê xo ey ra yenê war.” Na çarçewa de rojnameger Babbîn dîyar keno ke Erdogan 2003 de na tramwaye ra ame war. Yanî nêzdîyê 20 serrî yo kayê demokrasî yeno kaykerdene.
Ekonomî û polîtîkaya erdlerzî
Rojnamegero amerîkanij yew zî ekonomîya Tirkîya ser o tayê fikranê xo îfade keno. O vano ke Erdoganî xora çend serrî yo awanîya ekonomî xeribnabî û nê erdlerzî do krîzê ekonomî hîna zaf bixeripnê. Nika vernîya Erdoganî de di handîkapî estê. Hetêk ra alozîya ekonomîke her roje girdêr bena. Hetekê bînî ra hukmatê ci qurbanê erdlerzî têna ca verdayî. Nê di babetê girîngî -goreyê fikrê Babbînî- seba ameyoxê Erdoganî gef ê. Rojnameger derheqê erdlerzî de wina nuseno: “Erdoganî mîmar, muhendîs û mutahîd tede 110 nameyî îlan kerdî. O wazeno seba erdlerzî înan sûcdar bikero. Hukmatê Erdoganî yeno sûcdarkerdene ke seba xesarî cewabo giran da. Xebatkarê xelisnayîşî û fonê hetkarîye welatanê bînan ra resenê Tirkîya. Labelê hukmatê Erdoganî seba giranîya xîretanê hetkarîye bi şîdetî yeno rexnekerdene. Na rewşe do dîmenê weçînitişî rê tesîr bikero.”
Derbeya 2016î
Jed Babbîn nuseno ke derbeya 2016î pergala Erdoganî hêzdar kerde. Erdogan na derbe ra dima bi temamî derbasê dîktatorîye bî. Hukm, medya û pêro sîstem girewt binê serdestîya xo. Babbîn pare keno ke medyaya merkeze êdî propagandaya Erdoganî kena û xoserîya hukmî çin a. Çiqas ke Erdogan vano derheqê derbe de agahîya ey çin bîye, kes ci ra bawer nêkeno. Ne Tirkîya de ne zî welatanê bînan de kes bawer nêkeno ke hemverê Erdoganî derbeyêke qewimîyaye.
Derbasê hetê Rûsya bî
Gama ke Erdogan ame îqtîdar, welatanê Ewropa paştî dabî. Nê serranê peyênan mabênê înan de gurizyayîye esta. Sermayeya rojawanî hînî hukmatê Erdoganî ra bawer nêkena. Çike gamê ke Erdogan erzeno teberkîyê polîtîkaya rojawanî yê. Bitaybetî wextê şerê Ukrayna û Rûsya de reftarê hukmatê tirkî xeylê ame nîqaşkerdene û hema zî yeno nîqaşkerdene. Nê kontekstî de rojnameger Babbîn dîyar keno ke Erdogan zerreyê NATOyî de merdimo ke ci ra nêno bawerkerdene yo. O wina nuseno: “Erdogan derbasê hetê Rûsya bî. Nika endamîya Swêd û Fînlanda asteng keno. Ey waşt ke bextwaştoxanê kurdî yê ke Swêd de vera ey numayîş kerd bêrê peydedayene Tirkîya.” Babbîn pozîsyonê Erdoganî yo NATOyî xeylê rexne keno û ano ziwan ke seba hêzdarbîyayîşê NATOyî demokrasî qetî hewce keno.
Weçînitişê 2023î
Zanîyeno ke gulane 2023 de weçînitişê serekkomarîye û parlamento do bibê. Bêguman di erdlerzan planê Erdoganî bedilnayî. O nika wazeno weçînitişan bitexelno. Babbîn vano ke “eke” weçînitiş beno û rayî rast û biedalet yenê hûmaritine, o wext Erdogan eşkeno vîndî bikero yan ganî yo ke o vîndî bikero. Babbîn pare keno ke eke Erdogan nê weçînitişan de ser bikewo, o dem “demokrasî” bi temamî do birijîyo.
