Komeleya Rojnamegeran a Dîcle û Firatê (DFG) rapora binpêkirina mafên rojnamegeran a meha hezîranê aşkere kir. Li gorî raporê di meha hezîranê de 2 rojnameger hatin binçavkirin, 2 rojnameger hatin girtin û 3 rojnameger ji hatin cezakirin. Dîsa di vê mehê de 96 rojnameger hatin darizandin.

Komeleya Rojnamegeran a Dîcle û Firatê (DFG), têkildarî raporê daxuyanî da û wiha got: “Me meha hezîranê bi qerîna rojnamegerê ku got “Ez nikarim nefes bistînim” bi dawî kir. Mixabin vê mehê jî mafên gelek rojnamegeran hatin binpêkirin. Êrîşên li dijî rojnamegeran, bê hiqûqî, astengî zêde bûn. Doz li ser dozê vekirin û ceza li ser ceza li rojnamegeran birîn. Li Tirkiyeyê binpêkirina mafên mirov gihiştiye astekê ku ne tenê rojnameger, hemû beşên civakê êdî nikare nefese bistîne. Em hewl didin vê bê hiqûqî û pêşketinên neyînî bi raya giştî re parve bikin.”

Li 3 rojnamegeran ceza birîn

DGF’ê diyar kir ku di meha hezîranê de li rojnamegeran doz li ser dozê hat vekirin û wiha dirêj kir: “Ceza li ser ceza hat birîn. Li 3 rojnamegeran ceza birîn. Li rêveberê komeleya me û rojnameger Hakki Boltan bi hinceta “Heqaret li serokomar kiriye” ceza birîn. Ev ceza wêneyê hiqûqa Tirkiyeyê ye. Di vê mehê de ji ber du hempîşeyên me cezayên wan hatin erêkirin, hatin girtin. Hevalê me yê Rojnameger Sînan Aygun piştî hat girtin dîsa hat berdan. Di meha hezîranê de bi dehan rojnamegerên dihatin darizandin derketin pêşberî dadger.”

Polîsan nûçegîhanê APF’ê li erdê dirêj kir û pêl li sutuyê wî kirin

DFG’ê bal kişand ser tundiya polîsan a li dijî rojnamegeran û wiha lê zêde kir: “ Nûçegîhanê APF’ê Bulent Kiliç ê li Stenbolê çalaki dişopand, polisan ew li erdê dirêj kir û pêl li sutuyê wî kirin. Kiliç bi astengî û tundiya hişk a polîsan re rû bir û ma. Polîsan ew li erdê dirêj kir û bê nefes hiştin. “

Rojnameger li qadê bi tundiya esker û polîsan re rû bi rû dimînin

DFG’ê bal kişand ser tundiya polîs û eskeran jî û wiha berdewam kir: “Li gelek bajarên Tirkiyeyê dema rojnamegeran nûce dişopîndin, ji aliyê polîs, esker û derdorên din ve bi tundiyê re rû bir û man.  Rojnamegerên ku bi dewlet, çete û mafyayê re bi hevkarî karê vî pîşeyî dikin, dibin rûreşiya vî pîşeyî û wêneyê şermê. Divê bê zanîn ku heta rojnamegerên rastî û heqiqêtê bi civakê re par ve dikin hebin, bermahiyên mafya dê nikaribin wekî xwe bijîn. Dîsa divê yên vî welatî bi rêve dibin zanibin ku rojnameger ne di fermana tu kesan de ne. Rojnamegerên ku bi fermanê nûçeyan cê dikin û li gorî daxwaza îqtîdarê rojevê diyar dikin ew ne rojnameger in. Em dibêjin destê xwe ji pêsîra rojnamegeran berdin. Zextên li ser rojnamegeran bi dawî bikin. Dawî li sansura çapemeniyê li binpêkirinên mafan bînin.”

Daneyên Îstatîstikên rapora binpêkirina mafên rojnamegeran a meha hezîranê wiha ne:

*Rojnamegerên hatin binçavkirin                                      : 2

*Rojnamegerên hatin girtin                                              : 2

*Rojnamegerên bi êrîşan re rû bir û man                            : 8

*Rojnamegerên gefa sîxuriyê li wan hatin xwarin                : 2

*Rojnamegerên li qada nûçeyê hatin astengkirin                : 7 bûyer

*Rojnamegerên lêpirsîn li wan hat vekirin                          : 6

*Rojnamegerên doz li wan hat vekirin                               : 4

*Rojnamegerên hatin cezakirin                                         : Li 3 kesan; 8 sal, 5 meh û 2 roj hepis

*Rojnamegerên tene darizandin                                        : 34 dosya, 96 rojnameger

*Li girtîgehan binpêkirina mafên rojnamegeran                    :   1

*Cezayê RTUKê                                                                 : 3

*Astengiyên gîhandina Înternetê                                     : 21 nûçe, 2 malperên înternetê,

33 naverokên medya dîjîtal.

*Rojnamegerên dawî li kare wan hat anîn                           : 1

*Hêjmara Rojnamegerên Girtî (Heta 5’ê Tîrmeha 2021’an)    : 69