Çalakîkera Nobeta Edaletî Încî Guler Altindaga ke kekê ci 30 serrî yo zîndan de ya vat ke dewlete wazena tepişteyê sîyasîyî bimirê û wina qisey kerd: “Ma tersenê xebera mergî bigêrê coka key telefon biceno qerqilîyenê.”
Merdimê tepişteyanê nêweşan û tepişteyanê ke înfazê ci ameyo vêşnayene, 339 rojî yo Amed de Nobeta Edaletî kenê. Çalakîkeranê Nobeta Edaletî ra Încî Guler Altindaga ke kekê ci 30 serrî yo tepişte yo, derheqê têkoşînê keyeyanê tepişteyan de ANFyî rê qisey kerd.
Altindage îfade kerd înan verî sey çar keyeyan dest pê çalakîye kerdo la dima hûmara înan zêdîyaya. Altindage vat: “Wextê janî de pêvînayîşê bi tepişteyan ameybî kêmkerdene. O çax ma sey çar keyeyan şîyî Baroyê Amedî û bire daye ke Nobeta Edaletî bikerê. O çax zîndanan ra hende xeberê mergî nêameyêne. Nêzdîyê serrêk o ma çalakîye kenê. Ma şîyî Anqara û tay partîyanê sîyasîyan de pêvînayîşî kerdî. AKP û MHPyî ra ber ma pêro partîyan de roniştî. Înan soz da ke waştişanê ma bîyarê ca û babete bivisnê rojdemê Meclîsî. La înan sozê xo nêard ca. Xora eke înan sozê xo biardêne ca hende tepişteyî nêmerdêne.”
Altindage vist vîrî ke nê rojan de înfazê 5-6 tepişteyan ameyo vêşnayene û vat: “Bi seyan tepişteyê sîyasî zîndan de yê. Zafê înan nêweş ê. Ganî nê tepişteyî vera bidîyê la seba ke dewlete nêwazena hema zî zîndan de yê. Dewlete wazena tepişteyê sîyasîyî bimirê. Ma tersenê xebera mergî bigêrê coka key telefon biceno qerqilîyenê. Kekê mi cara 30 serrî yo zîndan de yo, ez nêwazena o bimiro.”
Altindage venga ê kesanê ke xo rê vanê ‘merdim’ da û vat: “Bibê vengê ma. Heta ke tepişteyê nêweşî vera bidîyê û qanûnê înfazî bêro betalkerdene ma do çalakîya xo rê dewam bikerê. Ganî partîyê sîyasî na babete nika bikerê rojdem. Verî ke merdimê ma bimirê wa babete rojdem bikerê. Eke ê bimirê hînî yew manaya rojdemkerdişî nêmaneno.”
