Qanûnê bingeyî yê Tirkîya de maddeya 2. de nusîyeno ke Komara Tirkîya komara huqûqî ya demokratîk, laîk û sosyal a. Reyna mehkemeyanê tirkan de bi herfanê pîlan nusîyeno ke “edalet bingeyê milkî yo”. Çiqas çekuyê xemilîyaye û cazîbedarê ke merdimî “kelecan” kenê. Oxina ke pratîk de qîymetê nê çekuyan çin o. Ganî maddeya 2. wina bêro newe ra nuştene: “Qiralîya Tirkîya qiralîya despotîk a kanperest, monîst û kapîtalîst a” Mehkemeyan de zî wina ke bibo merdim başêr fam keno: “Edalet tîtikê dizdan o”.
Mehkemeya Hemşaredara Sêrtî Sofya Alagaşe de avûkatan nêzdî 1 saete qisey kerd. Înan xeylêk serebûtan ra nimûneyî dayî, xeylêk qanûnan ra ciragirewteyî kerdî, qalê demokrasî, huqûq, azadîya çapemenî û heqanê merdiman kerd. La qet çîyêkî “pere” nêkerd. Çike dewlete dewleta huqûqî nîya. Huqûq her roje bi destê cerg û dizdan sey “mîrê kayan” yeno kaykerdene. Gilê dewlete de yew merdim est o. Her roje “dîkte” keno û hukm fermananê ey ano ca. Nameyê nê pergalî “dîktatorî” ya. Dîktator seba menfaetanê xo, seba îqtîdar û palkursîyê xo hukmî şuxilneno. Dozger û dadgerî pawenê ke dîktator kamcî fermanî dano. Ê goreyê huqûqî nê, goreyê waştiş û hewesanê dîktatorî têgêrenê. Senî ke komel bi destê na dîktatorîye “reaya” bî, dozger û dadgeran zî mîyanê “reaya” de cayê xo girewt. Çekuya reaya hetê etîmolojîkî ra yena manaya “garaneya mîyan”. Dîktatorîye wazena ke her dozger û dadger zî na garane de cayê xo bigêro.
Kayê demokrasî
Mehkemeya Alagaşe de hişê dadgeran de vizêrî ra qerar dîyabî. Înan uca de têna “rolê” xo kay kerd. Rolê kayê demokrasî. Yew vajo ke mehkeme est a û na mehkeme de dadgerî xebitîyenê. Oxina ke mehkeme de huqûqî ra ber her çî est bî. Bertîl, çaplûsîye û îtaet her qatê edlîya de boye danê. Dozger û dadgerî huqûq nê, sîyaset kenê. Ê seke sey îdarekarê AKPyî têgêrenê û bi hawayêko keyfî qeraran danê. Xora nê rojan yew îstatîstîk vila beno. Tirkîya de 22 hezar dozger û dadgerî est ê. Mîyanê nînan de 5 hezar kesan vere cû rêxistinanê qeza û şaristananê AKPyî de xebate kerda. Ê nika zî na polîtîkaya qilêrine mehkemeyan de anê ca.
Şero taybet
Qerarê qayûmî yê Sêrtî leteyê stratejîyê sîyasî yê “hukmatê cergan” o. Cergî seba ke îqtîdar de bimanê, hêrişê vera îradeyê şarî û bi taybetî kurdan kenê. Ê wina bermalê xo rê “çim şikinê”. Hem butçeya şarî diznenê, hem zî “dişmenî reyde têkoşîn” kenê. Şaredarîya Sêrtî de gama ke qayûm ame, verî beyraqa Tirkîya verê bînaya şaredarî de ameye daliqnayene. Seke Sêrt aîdê welatê bînî yo. Seke înan erdêko bîn îşxal kerdo. Bermalê xo hem keyfweş kenê, hem zî hîsê tirkperestîye û nîjadperestîye berz kenê. Çiqas ke vera kurdan hêriş kenê, bananê înan danê bombayan ver û kurdan qetil kenê, hende îqtîdarê xo hêzdar kenê. Pêro na polîtîkaya gemarine merdim eşkeno sey “şero taybet” pênas bikero. Coka tayînkerdişê qayûman leteyê şerê taybetî yo.
