Hemsereka FEDA Hurîye Kabayele ard ziwan ke dewlete erdlerzî bahane kena ke şar uca ra bivejîyo, dest bido mal û milkê elewîyan ser o.
Kabayele sere de mexdûranê erdlerzî rê şîfa û serweşîye waşte û wina vat, ‘‘Ma bi nê erdlerzî dî ke dewlete senî wazena bi hewayêkê sîstematîkî elewîyan çin bikera. Gere şarê ma yê elewî zî ney bivînê. Gere ma wayîrê xo bivejîyê. Elewîyî mecbûr mendê ke her tim xo bipawê û şîyê koyan ra ciwîyenê. Na bêtere de dewlete herinda ke hetkarî bikera, hewl dana ke şar uca ra şêro.’’
Nika ra dest dayo mal û milkê şarî ser o
Kabayele behsê ê îdîayan kerd ke vajîyeno deweyanê elewîyan ra, êyê ke veng bîyî, sunnîyê selefîyî ameyê bicakerdene. ‘‘Her kes zano ke dewlete bi hewayêkê sîstematîkî herêma Mereşî rê zilm kena. Hewl yeno dayene ke a herême veng biba. Herêma ma Terolar de kampê seba 30 hezar merdiman nayî ro ke zafîya înan DAÎŞij a, armanc kenê ke elewîyî ê cayan biterknê. Dewleta tirke xora planê naye kerdbî û nika zî erdlerzî kena bahane ke şar uca ra bivejîyo, dest bidê mal û milkê elewîyan ser o. Sey 1980î’’.
Elewîyê ke Ewropa de yê gere hetkarîya mexdûranê ma bikerê
Hurîye Kabayele dîyar kerd ke bi rayberîya FEDA û MARDEFî kampanyaya înan dewam kena û wina vat, ‘‘Seke mi verê zî vatbî, tîya şar tena Mereşî rê ney, heme cografyaya elewîyan rê wayîr vejîya. Kampanyayê ma dewam kenê û sewbîna ma xeylê sazgeh û karsazan reyde têkilî de yê. Ma hewl danê ke ê herêman ra cayêko xeta fayî nêşina, uca de banan bidê viraştene û şarê xo uca de bi ca bikerê. Hêvî kena ke ma bieşkîyê bikerê. Gere ma şarê xo yê herême rê hetkarî bikerê ke kulturê xo bipawê.’’
