Rojnamegere-nuştoxe Berrîn Sonmeze derheqê konseptê hêrişanê îşxalî û hêrişanê vera kultur û ziwanê kurdan de ANFyî rê qisey kerd.
Sonmeze da zanayene ke dewleta tirke wazena ke destkewteyanê kurdan qels bikero. Sonmeze pê hesna ke şarê kurdî şarêko xoverdayox û polîtîk o ke eşkeno verê nê hêrişan de vindero.
Sonmeze bale ante hêrişanê dewleta tirke yê vera Başûr û Rojawanî ser û vat: “Dewlete nêwazena ke Îran, Iraq û Sûrîye de zî kurdî bibê wayîrê otonomî. Dewlete kena ke PKK qabîlîyetê xo yê têgêrayîşî nê cayan de destî ra bikero. Goreyê dewlete eke PKK qels bibo, kontrolê şarê kurdî do bikewo destê ci.”
Sonmeze hêrişê vera kultur û ziwanê kurdan vistî vîrî û vat: “Vera nê hêrişan komel refleksêkê qelsî mojneno. No zî eşkera keno ke ferasetê nîjadperestîye welat de serdest o. Hetê bînî ra îqtîdar keno ke weçînayîşan ra dima kurdan ceza bikero. La weçînitoxê kurdî nê kerdişanê îqtîdarî do sindoqan de ceza bikerê.”
Berrîn Sonmeze vera muxalefetî nêrazîbîyayîşê xo mojna û vat ke ganî muxalefet seke vera destsernayîşê Şaredarîya Wanî têgêrayo vera nê hêrişan zî heman tewir bimojno.
