Bêguman azadîya fîzîkî ya Rêzdar Abdullah Ocalanî şertêko esasî nîyo. La qabê averşîyayîşê nê prosesî û qabê famkerdişê nîyetê dewleta tirke ferz o û mecbûrîyet o. Belê raray bi Rêzdar Abdulah Ocalanî dir pêvînayîşî pêk yenê la ena nîna manaya çinêbîyayîşê tecrîdî. Tecrîd bi heme xidarîya xo verdewam keno. Fikr û ramanê Rêzdar Abdullah Ocalanî hemayke binê tecrîdî de yê. Dewleta tirke hemayke fikr û ramanê Rêzdar Abdullah Ocalanî ra tersena. Û bi nê tecrîdî nêverdenê ke têkilîya Rêzdar Abdullah Ocalanî bi şaranê Tirkîya dir virazîyo û şar tewrê prosesê Aştî û Komelê Demokratîkî bibo.
Di nê prosesî de herî zêde çekuyanê aştî, entegrasyon û demokrasî ser nîqaşî est ê. Çiyo ke dewlete aştî ra fam kena û çiyo ke kurdî aştî ra fam kenê yewbînan ra dûrî yê. Aştî beyntarê 2 peran de aver şina û bi gameştişê wirdî peran xurt bena. Badê nê gamanê tarîxî yê kurdan hewce keno ke dewleteyke qabê şinasnayê vînê kurdan û qabê heqanê kurdan ê sîyasî û komelkî yê herî rewayan tay gamanê hiqûqîyan bierzo. Ma heme zanê ke aştî tenê bi ronayîşê çekanê HPG’yî nîna.
Etya de çekûya Rêzdar Abdullah Ocalanî ya “entegrasyono demokratîk” zaf muhîm a. Sankî entegrasyono demokratîk fina ke wa gerîla çekanê xo rono û bêro tewirê cuya komelkî bibo. Entegrasyono demokratîk o ke Rêzdar Abdullah Ocalan vano ono nîyo. Rêzdar Ocalan vano wa heme gerîlayî bêrê tewirê têkoşînê sîyasî bibê. Yanî wa şert û mercê sîyasetê azadî virazîyo. Wa kurdî bieşkê bi awayêko azad sîyaset bikerê.
Di nê prosesî de xala herî muhîm yewî ke Rojawan û Sûrîye yê. Muzakereyê beyntarê Herêma Xoserî û desthilatdarîya Şamî de verdewam kenê. Bi qaso ke ma çapemenî de vînenê di heme pêvînayîşan de temsîlîyetê cinîyan kî est o û vîna rêxistina cinîyan kî di çareserî de esas yeno girotiş. Ono eyseno ke badê pêvînayîşê Erdogan û Trumpî Sûrîye de lez dayo prosesî. Di çarçoweya peymana 10’ê adare de wazenê QSD tay gamanê şênberan bierzo. Loma QSD ser o zext û zor est o. Hêrişê ke Heleb û bendawa Tişrînî de pêk ameyî, parçeyêkê na polîtîkaya zext û zorî bî. Hetê bînî ra qabê îqnakerdişê QSD’yî zext û zorê Amerîka kî est ê. Her çiqas raştaraşt xoserîya herêmî red nêkerê ke wazenê QSD bi çiyo herî qiçkek razî bikerê.
Vanê ke xoserîya herêmî gorê Sûrîye nîya, gorê şaranê Sûrîye nîya… La êyê ke zanê ke di zaf dewletanê cîhanî de xoserîya herêmî fina pergalêkê herî rewa di merîyet de ya. Di Îspanya de, Îskoçya de, Swîss de û zaf dewletan de pergalê xoserîya herêmî est o. Bi ser de di Amerîka û zaf dewletanê Ewropa de modelê rayberîyanê herêmî yê federasyonan est o. Modelo ke heme dinya de beno gelo çîrê Rojawan de nêbeno. Esil mesela nêbîyayîş nîyo, esil mesela nîyetê înano xirab o. Yo ke nêverdeno virazîyo û vano nêbeno nîyetê Amerîka û dewleta tirk o xirab o.
Di menga vîyarte de KKTC (Qibris) de weçînayîş virazîya. KKTC de tenê 400 hezar kes cuyeno. Dewleta tirke qabê 400 hezar kesî federasyonî kî qebûl nêkena, dewletêka serbixo wazena. La Rojawan de bi mîlyonan kes cuyeno û dewleta tirke vîna înan nêşinasnena. Xoserîya herêmî ya ke kurdan bi gunîya 10 hezaran şehîdan bidest vista wazena çinê bikero. Kurdan ra vana çekanê xo ronê û şêrê teslîmê qatîlanê xo bibê. Dewleta tirk a ke Qibris de federasyonî red kena û dewleta serbixo wazena, Rojawan de Xoserîya Herêmî qebûl nêkena û qabê çinêkerdişê xoserîya Rojawanî çi dest ra yeno kena. Demo ke babete bena kurdî, nêeşkenê nîjadperestîya xo ya seserran bilimnê. Demildest dest bi gefan û şantajan kenê. Dewleta tirke di çar parçeyanê Kurdîstanî de hemay ke qabê verdewamê polîtîkaya qirkerdiş û çinêkerdişê kurdan a seserre xebetyena.
Ma heme zanê ke şoreşê Rojawanî bi ked û xoverdêrîya cinîya kurde û bi bedelêko zaf giran pêk amo. Bi keda heme şaranê enternasyolîstan Rojawan de pergalêko demokratîk awan bîyo. Rayberîya herêma xoserî ya Rojawanî vînê heme şaran û heme bawerîyan temsîl kena. Serkewtişê pergalê Rojawanî serkewtişê heme cinîyan û şaran o. Pawitişê pergalê Rojawanî pawitişê rûmetê merdimahî yo, pawitişê komelê azadî yo.
