Vervatoxa Meclîsê Cinîyan ê HDPyî Ayşe Acar Başarane îfade kerd ke hukmatê Erdoganî cayanê erdlerzî de eleqedar nêbeno û wina vat: “Cayanê ke ma şîyî, çîyo ke şarî bi tewirê zelalî, bi vengê berzî vatêne no bî, ‘Dewlete çîn a, îqtîdar çîn o’.”

Qiseykerdişê Başarane ra çîyêkê vejîyayî vernî wina yê: “Xeylêk embazanê ma nê prosesî de merdim û dostê xo vînî kerdî. Reyna ronayoxanê Komeleya Cinîyan a Welatperweran û sereka verên a komîsyonê HADEPî, aktîvîsta heqanê cinîyan û merdiman Melîke Alpe zî na bêtere de dinyaya xo bedilnaye. Ma do nê rojanê giranan pê paştîdayîşê girdî xo dima biverdê.”

Dewlete çîn a, îqtîdar çîn o

Başarane nê ercnayîşî kerdî: “Ma sey HDPyî roja verêne ra pêro pîya herêmanê erdlerzî de bîyî. Mi nê demî de Amed, Semsûr, Mereş û Elbîstan zîyaret kerdî. Ma pêrune dî ke na bêtera girde rîyê erdlerzî ra rîyê kêmayîya îqtîdarî ra qewimîyaye. Cayanê ke ma şîyî, çîyo ke şarî bi tewirê zelalî, bi vengê berzî vatêne no bî, ‘Dewlete çîn a, îqtîdar çîn o.’ Na raştîye her ca de yena ziwan. Wextê nê kaosî de ez heta Semsûrî raştê yew polîsê trafîkî zî nêameya. Şarî bi îmkananê xo kerdêne ke merdimanê xo binê rijnayîşan ra vejo. 24 saetanê verênan de hema awe û nan nêrasabî şarî. Xora rixmo ke 15 rojî ravêrtî ma zanê ke hema zî nê problemî ciwîyenî. Ma şarê xo bêwayîr nêverda. Nika embazê ma Mereş, Riha, Semsûr û Dîlok de mexdûranê erdlerzî rê eleqedar benê. Îqtîdaro ke roja verêne cayê şarî de nêbî, pê qeyûman ame hêrama erdlerzî ya Bazarcixî û dest na malzemeyê hetkarî ser.”