Hetkarê Hemserekanê Îdareyê Xoserî Bedran Çîya Kurdî vat: ”DAIŞ dima ke reyna ame binkerdene dewleta tirke pêro îmkanê xo seferber kerdî. Ganî şarê ma vera ney vejîyo meydanan.”
Hetkarê Hemserekanê Îdareyê Xoserî Bedran Çîya Kurdî derheqê hêrişanê dewleta tirke yê vera Şingal, Rojawan û Mexmûrî û têkilîyanê înan bi hêrişê Hesekê de qisey kerd.
Bedran Çîya Kurdî îfade kerd ke eşkera yo peyê hêrişê DAIŞî yê vera Hesekê de dewleta tirke esta. Kurdî vat: “Dewleta tirke waşt reyna DAIŞ gandar bikera. Dewleta tirke wazena qesasê DAIŞî bigêra. Efrîn, Serêkanîyê û Girê Sipî de heman çi bi. Dima ke cergî nêeşkayî çîyêk bikerê dewleta tirke bi xo kewte dewre. DAIŞ û dewleta tirke hemkarê stratejîk, îdeolojîk ê. Dewleta tirke seba ke xoverdayîş bişikna bi hemdemî hêrişê Hesekê, Eyn Îsa û Til Temirî kerd.
Dewleta tirke pê hêrişê vera Şingalî wazena vaja ke îradeyê Şingalî qebul nêkena. Tirkîya coka Şingal kerd hedef. Kampa Mexmûrî zî binê kontrolê Neteweyanê Yewbîyayeyan (NY) de ya la NY vera hêrişan bêveng o. Dewleta tirke na bêvengîye ra cesaret gêna. Ma venga her kesî danê ke wa verê hêrişanê dewleta tirke bigêro. Dewleta tirke seba pêro herême tehluke ya. Dewletê ke vera hêrişan bêveng ê, mesuldarê nê kerdişan ê. Vera hêrişanê dewleta tirke Îdareyo Xoser do têkoşîn bikero. Ma venga şarî danê ke wa vejîyo meydanan û têkoşîn bikero.” QAMISLO
